Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 103 Hüküm no: 91 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Yanaki'nin bağını Mustafa Çelebi'ye satması Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinlerinden Yanaki v. Nikola nâm zimmî meclis-i şer‘-i şerîfde işbu hâfizü’l-kitâb Mustafa Çelebi b. Mehmed nâm kimesne mahzarında bi-tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup karye-i mezbûre hâricinde Abdurrahman Ağa timârı toprağında vâki‘ bir tarafdan Yanaki nâm zimmî bağı ve bir tarafdan müşteri-i mezbûr bağı ve bir tarafdan Hırsafi nâm Nasrâniye bağı ve bir tarafdan tarîk-i hâs ile mahdûd tahmînen altı dönüm kürûmî mülk bir kıt‘a hora bağımı mezbûr Mustafa Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz beş kıt‘a esedî guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezbûr yüz beş kıt‘a esedî guruşu müşteri-i merkūm yedinden bi’t-tamâm ve’l-kemâl ahz a kabz eyledim, ba‘de’l-yevm bağ-ı mahdûd-ı mezkûr müşteri-i mezbûr Mustafa Çelebi’nin mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Cemâziyelâhire li-sene ışrîn ve mi'e ve elf. Şuhûdü’l-hâl: Abdurrahman Ağa [b.] el-Hâc Ali, Veli Çelebi [b.] el-Hâc Mehmed, Mehmed Efendi [b.] Mustafa, İbrahim Çelebi [b.] Mehmed, Halil Ağa [b.] Mehmed, Mustafa Beşe [b.] Mehmed, Mustafa Beşe [b.] Mehmed, Hüseyin Beşe [b.] Mehmed, Mehmed Beşe [b.] Ahmed, Mehmed Çelebi [b.] Ahmed el-Müezzin ve gayruhum.