Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 103 Hüküm no: 92 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Kurtiş ve Londazi'nin müşterek bağlarını Hasan b. Veli'ye satmaları Mustafa Çelebi Çavuşzâde. Medîne-i Üsküdar muzâfâtından Adalar nâhiyesine tâbi‘ Kartal nâm karye sükkânından Kurtiş ve Londazi veledeyn-i Petro nâm zimmîler meclis-i şer‘-i şerîfde işbu râfi‘u’l-kitâb Hasan b. Veli nâm kimesne mahzarında her biri ikrâr-ı tâm ve takrîr-i kelâm edip akd-i âti’z-zikrin sudûruna değin ale’l-iştirâki’s-seviyy silk-i mülkümüzde münselik olup karye-i mezbûre toprağında vâki‘ bir tarafdan Ahmed nâm kimesne bağı ve bir tarafdan Karamürselli nâm zimmî bağı ve bir tarafdan Ebubekir Beşe bağı ve bir tarafdan Çavuşzâde bağı ile mahdûd tahmînen dört dönüm bir kıt‘a kürûmî mülk bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi yedi kıt‘a esedî guruşa merkūm Hasan’a bey‘ ve teslîm ve temlîk eylediğimizde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr yirmi yedi kıt‘a esedî guruşu müşteri-i mezbûr Hasan yedinden her birimiz tamâmen ahz u kabz eyledik, ba‘de’l-yevm bağ-ı mahdûd-ı mezkûr müşteri-i merkūmun mülk-i müşterâsı ve hakk-ı sırfıdır, bizim kat‘â alâka ve medhalimiz kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fî-gurreti Recebi’l-mürecceb li-sene ışrîn ve mi'e ve elf. Şuhûdü’l-hâl: el-Hâc Ali b. Mehmed, Mehmed Ağa [b.] Mustafa, Veli Beşe b. Hamza, Ahmed b. Mahmud, Mehmed Efendi [b.] Mustafa el-Mukayyid.