Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 104 Hüküm no: 93 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık köyünden Mehmed'in Mustafa tarafından dövüldüğü iddiasını ispat edemediği Soğanlık’da Boduroğlu. Medîne-i Üsküdar muzâfâtından Adalar nâhiyesine tâbi‘ Soğanlık nâm karye sâkinlerinden Mehmed b. İsmail nâm kimesne tarafından husûs-ı âti’z-zikri da‘vâ[ya] vekîl olup İbrahim Bey b. Ali ve Ali Beşe b. Ramazan nâm kimesneler şehâdetleriyle şer‘an vekâleti sâbite ve sübût-ı vekâletine hükm-i şer‘î lâhık olan babası mezbûr İsmail b. Ahmed meclis-i şer‘-i şerîfde işbu râfi‘u’l-kitâb Mustafa b. Ali nâm kimesne mahzarında üzerine da‘vâ ve takrîr-i kelâm edip mezbûr Mustafa târîh-i kitâbdan dört gün mukaddem karye-i mezbûrede vâki‘ câmi‘-i şerîf karşusunda beyne’s-salât oğlum müvekkili mezbûr Mehmed’in başının sol cânibinden üç yerine asâ-yı kebîr ile darb ve mecrûh eyledi, suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve’l-inkâr müdde‘î-i mezbûr[dan] müdde‘âsını mübeyyine beyyine taleb olundukda isbât-ı beyyineden izhâr-ı acz ile istihlâf etmeğin mezbûr Mustafa ber-vech-i meşrûh üzere müvekkili [22a] merkūm Mehmed’in başının sol cânibinden üç yerine asâ-yı kebîr ile darb ve mecrûh etmediğine yemîn teklîf olundukda ol dahi alâ-vefki’l-mes'ûl half billâhi’l-azîm etmeğin mûcebiyle müdde‘î-i merkūm bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Cemâziyelâhire li-sene ışrîn ve mi'e ve elf. Şuhûdü’l-hâl: Süleyman Efendi b. Mahmud el-İmâm, el-Hâc Mehmed b. Ahmed, Hüseyin Çelebi b. Mehmed, Mahmud Çavuş b. Emrullah, Abdülbaki Beşe b. Mustafa.