Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 105 Hüküm no: 94 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyünden Kokone'ni evini Görgi'ye satması Karye-i Pendik, mülknâme Medîne-i Üsküdar muzâfâtından Adalar nâhiyesine tâbi‘ Pendik nâm karye sâkinelerinden Kokone bt. Kostantin nâm Nasrâniye meclis-i şer‘-i şerîfde işbu râfi‘u’l-kitâb Görgi v. Frankoli nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Andon nâm zimmî mülkü ve bir tarafdan Bodur Yani mülkü ve bir tarafdan Kulaksız Nikola nâm zimmî mülkü ve bir tarafdan tarîk-i âm ile mahdûd iki bâb fevkānî oda ve altında ahırı ve bir mikdâr havluyu müştemil mülk menzilimi tarafeynden îcâb ve kabûlü hâvî şart-ı müfsideden ârî bey‘-i bâtt-ı sahîh-i şer‘î ile mesfûr Görgi’ye yetmiş kıt‘a esedî guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabû[l] eyledikden sonra semeni olan meblağ-ı mezbûr yetmiş kıt‘a esedî guruşu müşteri-i mezbûr yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr müşteri-i mesfûrun mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ teşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Recebi’l-mürecceb li-sene ışrîn ve mi'e ve elf. Şuhûdü’l-hâl: Halil Ağa b. Mustafa, Veli Efendi b. Yahya, Ali Beşe b. Hasan, Hüseyin Beşe [b.] Osman.