Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 105 Hüküm no: 95 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolayoba köyü halkına ait olan vakıf arsa ve su kuyusunun el koyan Mustafa Beşe'den geri alınması Karye-i Dolayoba Medîne-i Üsküdar muzâfâtından Adalar nâhiyesine tâbi‘ Dolayoba nâm karye sâkinlerinden işbu ashâbü’l-kitâb Ahmed b. Mehmed ve Mehmed b. Hızır ve Hasan Beşe b. Osman nâm kimesneler meclis-i şer‘-i şerîf-i lâzımü’t-teşrîfde yine karye-i mezbûre sükkânından Mustafa Beşe b. Ahmed mahzarında her biri üzerine da‘vâ ve takrîr-i kelâm edip mezbûr Mustafa Beşe menzillerimiz kurbünde vâki‘ ahâlî-i karyeye mahsûs bir mikdâr vakıf arsa-i hâliye ve bi'r-i mâı kadîmü’l-eyyâmdan bu ana gelinceye değin cümlemiz mutasarrıflar olup ve suyundan intifâ‘ edegelmiş iken hâlâ vakıf arsa ve bi'r-i mâı fuzûlen zabt ve mülküne idhâl etmeğin suâl olunup kasr-ı yedine tenbîh olunması matlûbumuzdur dediklerinde gıbbe’s-suâl mezbûr Mustafa Beşe cevâbında fi’l-hakīka zikr olunan arsa-i hâliye ve bi'r-i mâ vech-i muharrer üzere vakıf olup kadîmü’l-eyyâmdan bu âna gelinceye değin cümlesinin vakfiyet üzere tasarruflarında olduğunu bi-tav‘ihî ikrâr ü i‘tirâf etmeğin mûcebiyle kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cemâziyelâhire li-sene ışrîn ve mi'e ve elf. Şuhûdü’l-hâl: Kıdvetü’l-meşâyihü’l-kirâm Ömer Efendi b. el-merhûm Ali Efendi, İbrahim Çelebi b. el-Hâc Mustafa, Mehmed Efendi b. İbrahim, Diğer Mehmed Efendi b. Musli el-İmâm, Hasan Beşe b. Ahmed, Mehmed Beşe b. Mustafa, Süleyman Çelebi b. İbrahim, Veli Efendi b. Yahya el-İmâm.