Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 106 Hüküm no: 96 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Süleyman'ın evinin yarım hissesini hanımına satması Kartal’da Süleyman hüccetidir. Husûs-ı âti’l-beyânın mahâllinde ketb ü tahrîr[i] iltimâs olunmağın cânib-i şer‘-i şerîfden Mevlânâ Mehmed Efendi b. Mustafa irsâl olunup ol dahi zeyl-i vesîkada muharrerü’l-esâmî Müslimîn ile medîne-i Üsküdar muzâfâtından Adalar nâhiyesine tâbi‘ Kartal nâm karyesinde sâkin Süleyman b. Mehmed nâm kimesnenin sâkin olduğu menzile varıp akd-i meclis-i şer‘-i şerîf etdikde mezbûr Süleyman meclis-i ma‘kūd-ı mezkûrede işbu bâ‘isetü’l-kitâb zevcesi Saliha bt. Hüseyin nâm hatun muvâcehesinde bi-tav‘ihî ikrâr-ı tâm ve takrîr-i kelâm edip [22b] akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Kasab Ömer nâm kimesne mülkü ve bir tarafdan el-Hâc Ali nâm kimesne mülkü ve bir tarafdan Süleyman nâm kimesne mülkü ve bir tarafdan tarîk-i âm ile mahdûd bir bâb tahtânî oda ve bir mikdâr bağçeyi ve kenîfi müştemil mülk menzilimin nısf hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevcem mezbûre Saliha’ya yirmi kıt‘a esedî guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr yirmi kıt‘a esedî guruşu zevcem mezbûre Saliha yedinden tamâmen ba‘de’l-ahz ve’l-kabz ba‘de’l-yevm menzil-i mahdûd-ı mezkûrun nısf hisse-i şâyi‘ası zevcem mezbûre Saliha’nın mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ma‘an ba‘s olunan Süleyman b. Mehmed ile meclis-i şer‘a gelip alâ-vukū‘ihî inhâ ve ihbâr etmeğin mâ-vaka‘a bi’t-taleb ketb olundu. Min-gurreti Recebi’l-ferd li-sene ışrîn ve mi'e ve elf. Şuhûdü’l-hâl: Ebubekir Beşe b. Halil, Mehmed b. Osman, Süleyman b. Mehmed, Hasan Beşe b. İsa, Mehmed Beşe b. Şaban, Mehmed b. Ali, Hüseyin b. Ebubekir, Mustafa Çelebi b. Ahmed Ağa.