Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 107 Hüküm no: 97 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Yıldırım Bayezid Han Evkafı'na ait bölgenin haricinde tuz satışının yasak olduğu Bursa’da vâki‘ cennet-mekân firdevs-âşiyân merhûm ve mağfûrün-leh Sultan Yıldırım Bayezid Han -aleyhi’r-rahmetü ve’l-gufrân- Evkāfı’ndan olup medîne-i Üsküdar’a muzâfe Adalar nâhiyesine tâbi‘ Tuzla nâm karye zâbit[i] olan râfi‘u hâze’l-kitâb Ahmed Ağa b. Mehmed meclis-i şer‘-i şerîfde Mehmed Ağa b. Şaban nâm kimesne mahzarında üzerine da‘vâ ve takrîr-i kelâm edip kadîmü’l-eyyâmdan bu âna değin vakf-ı mezbûr hudûdu dâhilinde Zeytinburnu demekle ma‘rûf mahâlden Çenger nâm karyeye varınca vakf-ı mezbûrun örüsü olmağla vakf-ı merkūm tuzlasından hâsıl olan tuz bey‘ olunagelip âharın tuzu bey‘ olunmayıp ve bey‘ olunduğu sûretde vakf-ı merkūma gadr-ı küllî olması mukarrer olup ve min-ba‘d vakf-ı şerîf örüsünde âharın tuzu bey‘ olunmakdan men‘ ü def‘ olunmak üzere fermân-ı âlî dahi sâdır olmuş iken mezbûr Mehmed Ağa fermân-ı şerîfe mugāyir örü-yi mezkûre dâhilinde tuz bey‘ eyleyip taraf-ı vakf-ı şerîfe gadr eder husûs-ı merkūma vukūf-ı tammı olan bî-garaz Müslimînden tefahhus ve haberleri tahrîr ve sûreti yedime i‘tâ ve ber-mûceb-i fermân-ı âlî men‘ ü def‘ olunması matlûbumdur dedikde gıbbe’s-suâl mezbûr Mehmed Ağa cevâbında örü-yi mezkûr dâhilinde tuz fürûht eylediğini ikrâr lâkin vech-i meşrûh üzere vakf-ı merkūm örüsünde âharın tuzu bey‘den men‘ olunduğu ma‘lûmum değildir deyü inkâr edicek, ahâlî-i karye-i mezbûreden Ahmed Ağa b. Mustafa ve İbrahim Ağa b. Mustafa ve Ali Beşe b. İbrahim ve Hasan Beşe b. el-Hâc İbrahim ve Ahmed Çelebi b. el-Hâc Mehmed ve Mehmed Beşe b. Mehmed ve diğer Ali Beşe b. İbrahim ve Hasan Beşe b. Ali ve Ramazan Beşe b. Abdullah ve İbrahim Beşe b. Ahmed ve Ahmed Beşe b. Hüseyin ve Halil Beşe b. el-Hâc İbrahim ve Mustafa Beşe b. el-Hâc İbrahim ve Mehmed Beşe b. Hüseyin ve Hüseyin Beşe b. Ramazan ve Ali Beşe b. Mustafa ve diğer Mustafa Beşe b. Ali ve diğer Mehmed Beşe b. Ali ve Abdi Beşe b. Abdullah ve Süleyman Beşe b. Abdullah ve Ali Beşe b. Mehmed ve Mehmed b. Ali nâm kimesnelerden husûs-ı merkūm istifsâr olundukda fi’l-vâki‘ kadîmü’l-eyyâmdan bu ana gelinceye değin vakf-ı mezbûr hudûdu dâhilinden zikr olunan Zeytinburnu demekle ma‘rûf mahâlden Çenger nâm karyeye varınca vakf-ı şerîfin örüsü olmağla vakf-ı mezbûr tuzlasından hâsıl olan tuz bey‘ olunagelip âharın tuzu bey‘ olunduğu ma‘lûmumuz değildir deyü her biri alâ-tarîkı’ş-şehâde haber vermeğin mûcebiyle örü-yi merkūm dâhilinde kadîme mugāyir tuz bey‘inden ber-mûceb-i fermân-ı âlî merkūm Mehmed Ağa men‘ ü def‘ olunmağın mâ-vaka‘a bi’l-ibtigā ketb olundu. Fi’l-yevmi’s-sâbi‘ aşer min-Cemâziyelâhire li-sene ışrîn ve mi'e ve elf. Şuhûdü’l-hâl: İbrahim Ağa b. Mehmed, Rüstem Ağa b. Bayram, Osman Bey b. Mehmed, Ali Çelebi b. Veyis, el-Hâc Mustafa b. el-Hâc Mehmed.