Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 108 Hüküm no: 98 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Viran köyünden Mehmed'in evini Hüseyin'e satması Medîne-i Üsküdar muzâfâtından Adalar nâhiyesine tâbi‘ Viran nâm karye sâkinlerinden Mehmed b. Ahmed nâm kimesne meclis-i şer‘-i şerîfde işbu hâfizü’l-kitâb Hüseyin b. Ali nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Ahmed Ağa nâm kimesne mülkü ve bir tarafdan Emine Hatun mülkü ve bir tarafdan müşteri-i mezbûr mülkü ve bir tarafdan tarîk-i âm ile mahdûd bir bâb tahtânî oda ve bir ahırı ve bir mikdâr havluyu müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yirmi kıt‘a esedî guruşa [23a] mezbûr Hüseyin’[e] bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr yirmi kıt‘a esedî [guruşu] müşteri-i merkūm yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr mezbûr Hüseyin’in mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fî-gurreti Rebî‘i’l-âhir li-sene ışrîn ve mi'e ve elf. Şuhûdü’l-hâl: Ahmed Çelebi b. Mustafa, İsmail Ağa b. Mehmed, Mustafa Çelebi b. Mehmed, Mehmed Efendi b. Mustafa, Musa Beşe b. Mehmed, Monlâ Hasan [b.] Ali, Hüseyin Beşe Yaylazâde.