Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 108 Hüküm no: 99 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakacık köyünden Ali'nin bağını Hanefi Beşe'ye satması Medîne-i Üsküdar muzâfâtından Adalar nâhiyesine tâbi‘ Yakacık nâm karye sâkinlerinden Ali b. Nasuh nâm şâbb-ı emred meclis-i şer‘-i şerîfde işbu hâfizü’l-kitâb Hanefi Beşe b. ( ) nâm kimesne tarafından husûs-ı âti’z-zikri tasdîka vekîl-i müsecceli olan İsmail Beşe b. Mustafa nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan müvekkili mezbûr Hanefi Beşe bağı ve iki tarafdan Hasan Beşe bağı ve bir tarafdan tarîk-i âm ile mahdûd tahmînen bir dönüm bir kıt‘a kürûmî mülk bağımı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile yirmi üç kıt‘a esedî guruşa müvekkil-i mezbûr Hanefi Beşe’ye bey‘ ve teslîm ve temlîk eylediğimde ol dahi ber-minvâl-i muharrer iştirâ ve tesellüm ve temellük ve kabz ü kabûl eyledikden sonra semeni olan meblağ-ı mezbûr yirmi üç kıt‘a esedî guruşu müvekkil-i mezbûr Hanefi Beşe’nin yedinden tamâmen ahz u kabz eyledim, ba‘de’l-yevm bağ-ı mahdûd-ı mezkûr merkūm Hanefi Beşe’nin mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Recebi’l-mürecceb li-sene ışrîn ve mi'e ve elf. Şuhûdü’l-hâl: Ali Beşe [b.] Ahmed, Ahmed Beşe [b.] İbrahim, Mehmed Efendi [b.] Mustafa, Salih Beşe [b.] İbrahim, Memiş Beşe [b.] Ahmed, Ömer Beşe [b.] Yunus, Mahmud Ağa [b.] Emrullah.