Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 109 Hüküm no: 100 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurt köyü zabiti Mehmed'in köydeki boz ve boş tarlanın tasarruf hakkını İbrahim Çelebi'ye satması Kurt karyesinde Torunoğlu İbrahim Çelebi hüccetidir. Medîne-i Üsküdar muzâfâtından Adalar nâhiyesine tâbi‘ Kurt nâm karye zâbit[i] olan el-Hâc Mehmed b. Ahmed nâm kimesne meclis-i şer‘-i şerîfde işbu râfi‘u’l-kitâb İbrahim Çelebi b. Ahmed nâm kimesne mahzarında ikrâr-ı tâm ve takrîr-i kelâm edip karye-i mezbûre toprağında vâki‘ bir tarafdan mezbûr İbrahim Çelebi Bezirhânesi ve bir tarafdan ba‘zen yine İbrahim Çelebi ve ba‘zen Ali nâm kimesne tarlaları ve iki tarafdan tarîk-i âm ile mahdûd tahmînen iki şinik tohum isti‘âb eder tarla yirmi seneden mütecâviz boz ve hâlî kalıp kānûn üzere tapuya müstahak olmağla zikr olunan tarlayı merkūm İbrahim Çelebi’ye on guruş resm-i tapu-yı misli ile tefvîz eylediğimde ol dahi ber-minvâl-i muharrer tefevvüz ve kabûl eyledikden sonra meblağ-ı mezbûr on guruşu merkūm İbrahim Çelebi yedinden tamâmen ahz u kabz eyledim dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Recebi’l-ferd li-sene ışrîn ve mi'e ve elf. Şuhûdü’l-hâl: Ahmed Efendi el-İmâm, Mustafa Efendi b. Ali el-İmâm, Süleyman b. İsa, Mehmed b. Mustafa, İbrahim Beşe b. Ahmed.