Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 109 Hüküm no: 101 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Andon'un evini İbrahim Çelebi'ye satması Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinlerinden Andon v. Tika nâm zimmî meclis-i şer‘-i şerîfde işbu hâfizü’l-kitâb İbrahim Çelebi b. Mehmed nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Malamat nâm zimmî mülkü ve bir tarafdan Lika nâm zimmî mülkü ve bir tarafdan Vartalamozoğulları mülkleri ve bir tarafdan tarîk-i hâs ile mahdûd bir bâb fevkānî oda ve bir bâb tahtânî oda ve altında ahırı ve önünde müşterek bi'r-i mâyı müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile yüz seksen bir kıt‘a esedî guruşa bey‘ ve temlîk ve teslîm ve temlîk eylediğimde ol dahi ber-minvâl-i muharrer iştirâ ve tesellüm ve temellük ve kabz [u] kabûl eyledikden sonra semeni olan meblağ-ı mezbûr yüz seksen bir kıt‘a esedî guruşu müşteri-i mezbûr yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr mezbûr İbrahim [23b] Çelebi’nin mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Recebi’l-mürecceb li-sene ışrîn ve mi'e ve elf. Şuhûdü’l-hâl: el-Hâc Mehmed [b.] Veli, Himmet Ağa [b.] Mehmed, Mustafa Çelebi b. Mehmed, el-Hâc Ahmed Ağa b. Halil, Ahmed Çelebi b. Şaban, Musa Beşe [b.] Mehmed, el-Hâc Mehmed [b.] Yakub.