Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 110 Hüküm no: 102 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden İbrahim Çelebi'nin evini Danyel, Sakayonoz ve Savatyanos adlı zimmilere satması Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinlerinden İbrahim Çelebi b. Mehmed nâm kimesne meclis-i şer‘-i şerîf-i enverde işbu bâ‘isûnü’s-sifr Danyel ve Sakayonoz ve Savatyanos nâm zimmîler muvâcehelerinde ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan müşteriyûn-ı mesfûrûn mülkleri ve bir tarafdan tarîk-i hâs ile mahdûd bir bâb fevkānî oda ve bir bâb tahtânî oda ve altında ahırı ve dehlîzi ve önünde müşterek bi'r-i mâyı müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mesfûrûn Danyel ve Sakayonoz ve Savatyanos nâm zimmîlere ale’l-iştirâki’s-seviyy bey‘ ve teslîm ve temlîk eylediğimde semeni olan meblağ-ı mezbûr yüz seksen dört kıt‘a esedî guruşu müşteriyûn-ı mesfûrûn yedlerinden tamâmen ahz u kabz eyledim, ba‘de’l-yevm menzil-i mahdûd-ı mezkûr müşteriyûn-ı mesfûrûnun mülk-i müşterâları ve hakk-ı sırflarıdır, benim kat‘â alâka ve medhalim kalmadı, keyfe mâ teşâ ve tahtâr mutasarrıf olsunlar dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-hâmis ve’l-ışrîn min-Recebi’l-ferd li-sene ışrîn ve mi'e ve elf. Şuhûdü’l-hâl: Mehmed Efendi [b.] Mustafa, Mustafa Çelebi [b.] Mehmed, Ali Beşe [b.] Ramazan, Mahmud Beşe [b.] Musli, Himmet Ağa [b.] Mehmed, İbrahim Beşe [b.] Mehmed, Çırak Mehmed.