Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 110 Hüküm no: 103 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Papa Varsami'nin alacak iddiasını ispatlayamadığı Medîne-i Üsküdar muzâfâtından Adalar nâhiyesine tâbi‘ Kartal [nâm] karye sâkinlerinden iken bundan akdem hâlik olan Papa Ohan v. Varsam nâm Ermeninin verâseti ancak sulbî kebîr oğlu Papa Varsami nâm Ermeniye münhasıra olduğu zâhir ve nümâyân oldukdan sonra mesfûr Varsami meclis-i şer‘-i şerîf-i enverde işbu râfi‘u’s-sifr Agya v. Nikogos nâm Ermeni muvâcehesinde üzerine da‘vâ ve takrîr-i kelâm edip babam hâlik-i mesfûrun mezbûr Agya zimmetinde cihet-i karz-ı şer‘îden elli kıt‘a esedî guruş hakkı olmağın suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile müdde‘î-i mesfûrun babası hâlik-i merkūm Papa Ohan’a vech-i muharrer üzere cihet-i karz-ı şer‘îden elli kıt‘a esedî guruş deyni olmadığına mersûm Agya’ya yemîn teklîf olundukda ol dahi alâ-vefki’l-mes'ûl half billâhillezî enzele’l-İncîle alâ-İsa -aleyhi’s-selâm- etmeğin mûcebiyle müdde‘î-i merkūm bî-vech mu‘ârazadan ba‘de’l-men‘ mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Recebi’l-mürecceb li-sene ışrîn ve mi'e ve elf. Şuhûdü’l-hâl: Fahrü’l-eşbâh Abdurrahman Ağa [b.] el-Hâc Ali Ağa, el-Hâc Mehmed [b.] Yakub, el-Hâc Mehmed [b.] Halil, Mehmed Efendi [b.] Mustafa.