Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 580 Hüküm no: 712 Orijinal metin no: [125a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Bey b. Ebûbekir’in Mimar Sinan Ağa Vakfı’ndan satın aldığı mülkü tarafların rızasıyla geri verdiği Husûs-ı âti’z-zikrin mahallinde ketb [ü] tahrîri için savb-ı şer‘îden irsâl olunan Ebûbekir Efendi b. el-Hâc Abdülkerim mahmiye-i İstanbul’da Kâtib Şemseddin mahallesi sükkânından iken bundan akdem vefât eden Abdülkādir Ağa b. Mehmed’in menziline varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Voynuk Şucâ‘ mahallesi sükkânından Ömer Bey b. Ebûbekir tarafından husûs-ı âti’z-zikri ikrâra vekîl-i müsecceli olan Abdülbâkī Ağa b. Abdülganî meclis-i ma‘kūd-ı mezbûrda, merhûm Mi‘mâr Sinan Ağa vakfına evlâdiyyet üzre mütevellî olan umdetü’l-emâcid ve’l-ekârim sâhib-i hâze’l-kitâb Mahmud Bey b. el-merhûm Ahmed Paşa tarafından husûs-ı âti’z-zikre vekîl-i sâbitü’l-vekâlesi olan Mustafa Çelebi b. İbrahim mahzarında bi’l-vekâle ikrâr-ı tâm ve takrîr-i kelâm edip müteveffâ-yı mezbûr Abdülkādir Ağa’nın ile’l-vefât ebniyesi mülk ve hakkı ve arsası vakf-ı mezbûrdan mukāta‘a-i ma‘lûme ile taht-ı tasarrufunda olup zikri mürûr eden Kâtib Şemseddin mahallesinde vâki‘ ma‘lûmü’l-hudûd işbu menzilin ebniyesini müteveffâ-yı mezbûrun veresesi semen-i ma‘lûm ve makbûza müvekkilim mezbûr Ömer Bey’e bey‘ ve teslîm ve arsasını meccânen ferâğ eylediklerinde müvekkilim mezbûr Ömer Bey semen nâmıyla mütevellî-i mûmâ-ileyh Mahmud Bey’e beş yüz guruş def‘ ve teslîm ol dahi ahz u kabz etmişdi. [125b] Hâlâ akd-i mezbûru beynlerinde fesh ve ikāle ve arsa-i mezbûreler yine verese-i mezbûreden ferâğ ve tefvîz etmekle müvekkil-i mezbûr Ömer Bey dahi mütevellî-i mezbûra ber vech-i muharrer müdde‘â olan meblağ-ı mezbûr beş yüz guruşunu vekîl-i mezbûr Mustafa yedinden tamâmen ahz u kabz edip meblağ-ı mezbûrdan bir akçe bâkī kalmadı dedikde gıbbe’t-tasdîki’ş-şer‘î mâ vâki‘ hâli mezbûr Ebûbekir Efendi mahallinde tahrîr ve ba‘dehû ma‘an ba‘s olunan Ahmed Beşe b. Abdullah ve Mehmed b. İdris ile meclis-i şer‘a gelip alâ vukū‘ihî inhâ etmeğin mâ vaka‘a bi’t-taleb ketb olundu. Fi’l-yevmi’r-râbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: ( ). [Şuhûd-ı sâbikūn].