Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 581 Hüküm no: 713 Orijinal metin no: [125b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin Ağa’nın çiftliğinin vârislerince Hasan Çelebi b. Abdurrahman’a satılması Vilâyet-i Anadolu’da Kangırı sancağından Milan kazâsına tâbi‘ Dalkoz nâm karye ahâlîsinden olup bin doksan altı senesinde küçük sakabaşı iken hacc-ı şerîf avdetinde Bedr-i Hüseynî? nâm mevzi‘de vefât eden el-Hâc Hüseyin Ağa b. Mustafa b. Hüseyin’in verâseti li ebeveyn kız karındaşları Hatice ve Döndü ve li üm kız karındaşları Âsiye ve Fâtıma nâm hâtunlara münhasıra olduğu şer‘an mütehakkik oldukdan sonra mezbûre Hatice asâleten ve merkūme Fâtıma’nın vekîl-i sâbitü’l-vekâlesi olmağla ve merkūme Âsiye tarafından dahi husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Ramazan Beşe b. İbrahim ve Ahmed Beşe b. Hüseyin şehâdetleri [ile] sâbite olan Ömer b. Halil ve merkūme Döndü tarafından dahi vekîl olduğu şâhidân-ı mezbûrân şehâdetleriyle sâbit olan Murad b. Mahmud nâm kimesnelerden her biri vekâleten meclis-i şer‘-i hatîr-i lâzımü’t-tevkīrde bâ‘isü hâze’l-kitâb Hasan Çelebi b. Abdurrahman nâm kimesne mahzarında her biri ikrâr ve takrîr-i kelâm edip müteveffâ-yı mezbûrun terekesinden olup medîne-i Şâm-ı dârü’s-selâm’da Eşrefiyye nâm karyede vâki‘ yedimizde olan hüccet-i şer‘iyye nâtıka olduğu üzre müteveffâ-yı mezbûr zâtı ile tahdîd ve tavsîfden müstağnî çiftlik ta‘bîr olunur büyût-ı adîde ve hadîka ve besâtîni müştemil olan emlâki bi’l-irsi’ş-şer‘î mezbûrâna intikāl etmekle hâlâ mezbûrân Hatice ve Döndü ve Âsiye ve Fâtıma her biri zikr olunan çiftliği cemî‘ tevâbi‘ ve levâhıkı ve âmme-i hukūk ve merâfıkı ile merkūm Hasan Çelebi’ye bi safkatin vâhidetin tarafeynden îcâb ve kabûlü hâvî şurût-ı müfsideden ârî bey‘-i kat‘î ile bin iki yüz esedî guruşa bey‘ ol dahi ber vech-i muharrer iştirâ ve kabûl eylediğinden sonra semeni olan meblağ-ı mezbûrun beş yüz guruşunu mezbûr Hasan Çelebi’nin müteveffâ-yı mezbûr zimmetinde deyni olan beş yüz guruşa her biri takās, ol dahi mukāssa ve kabûl edip bâkī yedi yüz guruşunu mezbûr Hasan Çelebi’den bi’t-tamâm ahz u kabz edip mârrü’z-zikr çiftliği tahliyyeten kabza taslît eyledi ba‘de’l-yevm sâlifü’z-zikr çiftlik cemî‘ müştemilâtıyla mezbûr Hasan Çelebi’nin mülk-i müşterâsıdır keyfe mâ yeşâ mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ramazan Beşe b. İbrahim, Ahmed Beşe [b.] Hüseyin, Mustafa Ağa Ser-muhzır, Ali b. Bâli.