Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 582 Hüküm no: 714 Orijinal metin no: [125b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Receb’in menzil ve arazilerini yeğeni Receb b. Mustafa’ya hibe etmesi Vilâyet-i Anadolu’da Kastamonu sancağında Küre-i Nühâs kazâsına tâbi‘ Gölcük nâm karye ahâlîsinden olup elli ikinci ağa bölüğüne mahsûs oda yoldaşlarından olmağla hâlâ odasında sâkin olan Mehmed Beşe b. Receb meclis-i şer‘-i şerîf-i enverde li ebeveyn karındaşı oğlu işbu bâ‘isü’l-kitâb Receb b. Mustafa mahzarında ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilimi ve anbarı ve içinde mevcûd adedi beynimizde ma‘lûm devâb ve hayvânât ve sâir esâs-ı beyt ve âlât-ı hırâset ve zirâ‘ati bi cümleti’t-tevâbi‘ ve’l-levâhık [126a] mezbûr Receb’e seksen guruşa bi safkatin vâhidetin bey‘ ve temlîk ve karye-i mezbûre sınırı dâhilinde mevâzi‘-i adîde[de] vâki‘ ma‘lûmü’l-hudûd ve’l-kıta‘ arâzi-i müte‘addidemi sâhib-i arz ma‘rifetiyle meccânen ferâğ ve tefvîz ol dahi iştirâ ve tesellüm ve tefevvüz ve kabûl ettiğinden sonra semen-i mezbûru Receb’e hibe-i sahîha ile hibe ve temlîk ol dahi meclis-i hibede ittihâb ve kabûl edip mebî‘ât-ı mezbûre ve arâzi-i mezkûremi mahallinde kabz ve tasarrufa mezbûr Receb’i taslît eyledim min ba‘d mebî‘ât-ı mezkûre merkūm Receb’in emlâk-i müşterâtı ve arâzi-i merkūme havza-i tasarrufu olmuşdur benim aslâ alâka ve medhalim kalmamışdır dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’l-hâmis min Şevvâli’l-mükerrem [li sene seb‘a ve tis‘în ve elf.] Şuhûdü’l-hâl: Hasan Çelebi b. Hüseyin, İbrahim b. Musli, Ahmed Beşe b. Mehmed. Ali Beşe b. Mehmed, Mehmed Beşe b. Musli.