Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 121 Hüküm no: 120 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Tomayi'nin bağını Hüseyin Beşe'ye satması Medîne-i Üsküdar muzâfâtından Adalar nâhiyesine tâbi‘ Kartal sâkinelerinden Tomayi v. Pozima Nasrâniye tarafından bey‘-i âti’l-beyâna vekâleti Molla Mehmed b. Süleyman ve Veli Beşe b. Hamza nâm kimesneler şehâdetleriyle sâbite olan Ayalon v. Danyel zimmî meclis-i şer‘-i hatîr-i lâzımü’t-tevkīrde işbu hâfizü hâze’l-kitâb Hüseyin Beşe b. Mustafa mahzarında ikrâr-ı tâm ve takrîr-i kelâm edip müvekkilem mesfûre Tomayi Nasrâniyenin akd-i âti’l-beyânın sudûruna değin silk-i mülkünde münselik Anbarcı karyesi? kurbünde vakıf toprağında vâki‘ bir tarafdan Poli zimmî bağı ve iki tarafdan müşteri bağı ve bir tarafdan Kara Çavuş bağı ile mahdûd tahmînen bir dönüm hora bağını bi’l-vekâle mezbûr Hüseyin Beşe’ye bey‘-i bâtt-ı kat‘î ile on bir guruşa bey‘ ve teslîm, ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm on bir guruşu mezbûr Hüseyin Beşe yedinden bi’l-vekâle ahz u kabz eyledim, ba‘de’l-yevm bağ-ı mahdûd-ı mezkûr mezbûr Hüseyin Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâlis min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: Ahmed Efendi, Serdâr Mahmud Çavuş, Mehmed Beşe b. Ahmed, Veli Beşe b. Hüseyin, Hasan Çelebi Hüseyinzâde.