Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 583 Hüküm no: 715 Orijinal metin no: [126a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayrünnisâ bt. Hacı Mehmed’in menzilini Abdullah Efendi b. Resul Efendi’ye satması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i şerîfden Mevlânâ es-Seyyid İsmail Efendi b. es-Seyyid İsmail irsâl olunup ol dahi mahmiye-i İstanbul’da Edirnekapısı dâhilinde Hatice Sultan mahallesinde mefharü’l-müderrisînü’l-kirâm es-Seyyid Mehmed Efendi’nin menziline varıp zeyl-i rakīmde mastûrü’l-esâmî olan müslimîn huzûrunda akd-i meclis-i şer‘-i mübîn eyledikde mahalle-i mezbûrede sâkine iken bundan akdem vefât eden Ayşe bt. [Ahmed] Ağa b. Mahmud nâm hâtunun babası mezbûr Ahmed Ağa’nın li ebeveyn kız karındaşı Fâtıma nâm hâtunun sadriye kızı ve zî-rahm cihetinden vârisesi olup zâtını ma‘rifet-i şer‘iyye ile ârifân olan es-Seyyid Mehmed Çelebi b. es-Seyyid Cafer Efendi ve Mehmed b. Receb nâm kimesneler ta‘rîfleriyle mu‘arrefe olan Hayrünnisâ bt. el-Hâc Mehmed nâm hâtun meclis-i ma‘kūd-ı merkūmda işbu sâhibü’l-kitâb kıdvetü’l-müderrisînü’l-kirâm Abdullah Efendi b. Resul Efendi mahzarında ikrâr-ı tâm ve takrîr-i kelâm edip mûrisem müteveffât-ı mezbûre Ayşe Hâtun’un ile’l-vefât yedinde mülkü olup ba‘de vefâtihâ irs-i şer‘le bana intikāl edip mahalle-i mezbûrede vâki‘ bir tarafdan âhar mülk-i mevrûsum olan menzil ve bir tarafdan ba‘zan müşterî-i mezbûr Abdullah Bey mülkü ve ba‘zan yine mülk-i mevrûsum olan menzil ve bir tarafdan kâtib Mehmed Efendi bahçesi ve bir tarafdan tarîk-i âm ile mahdûd iki bâb fevkānî oda ve bir sofa ve bir dehliz ve bir harâbe tahtapûş ve bir harâbe matbah ve bir asma kiler odası ve bir dut ve bir incir ve bir asma ağaçlarını muhtevî cüneyneyi müştemil menzilimi bi cümleti’t-tevâbi‘ ve’l-levâhık mûmâ-ileyh Abdullah Efendi’ye tarafeynden îcâb ve kabûlü hâvî [ve] şurût-ı müfsideden ârî bey‘-i kat‘î ile iki yüz yirmi guruşa bey‘ ve teslîm ol dahi ber vech-i muharrer iştirâ ve tesellüm ve kabz ve kabûl eylediğinden sonra semeni olan meblağ-ı mezbûr iki yüz yirmi guruşu mûmâ-ileyh Abdullah Efendi işbu meclis-i ma‘kūd-ı merkūmda bana edâ ve teslîm ben dahi yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezbûr mûmâ-ileyh Abdullah Efendi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an ba‘s olunan Resul b. Musli ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mefharü’l-müderrisînü’l-kirâm es-Seyyid Mehmed Efendi, umdetü’l-kuzât Ali Efendi b. Abdülmümin, fahrü’l-kuzât Musa Efendi, Mehmed Ali Efendi b. Mustafa Efendi, Mehmed Efendi b. Mahmud, es-Seyyid Mehmed Çelebi b. es-Seyyid Cafer, Mehmed b. Receb, Süleyman b. Halil.