Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 584 Hüküm no: 716 Orijinal metin no: [126b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İpek tâcirlerinden mükerrer vergi alınmaması Medîne-i Tokat’da ham harîr iştirâ ve İstanbul’a bey‘ eden tüccârdan ashâbü hâzihi’l-vesîka Solak el-Hâc Mehmed b. Veli ve Hamza b. el-Hâc İbrahim ve el-Hâc Süleyman b. el-Hâc Bâli ve Mehmed b. Ali ve Halil Efendi b. Mehmed ve el-Hâc İbrahim b. Ali ve el-Hâc Hasan b. Mustafa ve iştirâ-i harîr eden tâifeden Kör el-Kefevî? Mehmed b. İshak ve Hüseyin b. İbrahim ve Mehmed b. Receb ve Abdullah Çelebi b. Hasan ve el-Hâc Kenan b. Abdullah ve el-Hâc Sâlih b. Süleyman nâm kimesneler ile tâife-i mezbûre yahudilerinden İsrail v. İlifne ve Arslan v. Sebab ve Yahuda v. Yako ve ( ) veled-i Beşream ve Abraham v. İsak ve Samarya ve Ellez ve sâirleri meclis-i şer‘-i şerîf-i enver ve mahfil-i dîn-i münîf-i ezherde hâlâ mîzân-ı harîr emîni olan el-Hâc Osman Ağa muvâcehesinde her biri takrîr-i kelâm edip kadîmü’l-eyyâmdan bizim ve sâir tüccârın Tokat’dan iştirâ eyledikleri ham harîri Tokat mîzân-ı harîrinde vezn ettir deyû mîzân-ı harîr ümenâsı taraflarından kabza me’mûr olan Tokat voyvodalarına mîrî rüsûmunu edâdan sonra deste bükündüp bey‘ için Âsitâne-i sa‘âdet’e getirdiklerinde gümrük emînlerine gümrüğünü edâ edip bey‘ ve şirâ oluna gelmişiken mezkûr el-Hâc Osman Ağa kadîme muhâlif gönderdiği deste için mîzân vaz‘ ve bir resm dahi alırım deyû resm-i âhar talebiyle rencîdeden hâlî olmamağla arz-ı hâl olunup taraf-ı aliyyeden muhâsebe defterlerine mürâca‘at olundukda Tokat’da vâki‘ mîzân-ı harîr mukāta‘asının malı otuz iki bin guruş olup gelen harîrin batmanından beş rub‘ riyâlî guruş resm-i mîzân ve deste yükünden üç riyâlî guruş yasakiyye? ve İstanbul’da dahi gümrüğü alınıp bundan tecâvüz olunmamak üzre mastûr ve mukayyed bulunmağla kadîmden bâ fermân-ı âlî alınagelen resm-i mîrî ve yerinde gümrüğü alındıkdan sonra hilâf-ı inhâ ile aldığı emr-i şerîf mûcebince ziyâde talebiyle rencîdeden men‘ olunmuşiken yine de mezkûr el-Hâc Osman ziyâde resm talebiyle bizi rencîdeden hâlî değildir husûs-ı mezbûr kendiden suâl olunup yedimizde verdiği evâmir-i şerîfe mûcebince bî-vech ta‘arruzdan men‘ olunması matlûbumuz deyû tuğrâ-yı garrâ-yı sultânî ile mücellâ müte‘addid evâmir-i şerîfe ibrâz edip merkūm el-Hâc Osman Ağa muvâcehesinde feth ve kırâat olundukda Tokat ham harîr iştirâ eden tüccâr tâifesi iştirâ eyledikleri harîri Tokat mîzân-ı harîrinde vezn ettirip mîrî rüsûmunu edâ ettikden sonra deste bükündüp füruht için Âsitâne-i sa‘âdet’e getirdiklerinde kadîmü’l-eyyâmdan bu âna gelince birinde dahi gümrük emînlerine gümrüğün verip füruhtda aslâ bir tarîkle ta‘arruz oluna gelmemişiken hâlâ Âsitâne’de dahi deste için bir mîzân vaz‘ ve bir resm-i mîzân dahi almak hilâf-ı inhâ fermân sâdır olmağla tâife-i mezkûreye ziyâde gadr ve zarar olmağla Tokat mîzân-ı harîrinde vezn ve resm-i mîrîsi alınan desteden tekrâr bundan resm alınmaya deyû mastûr ve musarrah bulunup ve mezkûr el-Hâc Osman Ağa dahi bu âna gelince sâir ümenâ ve kendi bundan bir resm dahi alına gelmiş olmamağla alınmadığını ikrâr etmeğin ber mûceb-i emr-i şerîf-i âlîşân tâife-i mezkûreyi resm-i âhar talebiyle rencîde etmemek üzre merkūm el-Hâc Osman Ağa’ya cânib-i şer‘-i şerîfden tenbîh olunup işbu vesîka bi’t-taleb ketb olundu. Fî evâhiri şehri Ramazâni’l-mübârek li sene seb‘a ve tis‘în [ve elf]. Şuhûdü’l-hâl: Mustafa Çelebi b. Abdurrahman, Mustafa Çelebi b. el-Hâc Ahmed, İbrahim Çelebi b. Ahmed, Mehmed Efendi b. Mustafa, Mehmed Efendi b. Muhyi[ddin], Mehmed b. İdris, İbrahim Çelebi b. Ahmed, Ebûbekir b. Abdi.