Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 131 Hüküm no: 138 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Drador'un mülk bağını Bogos'a satması Medîne-i Üsküdar muzâfâtından Adalar nâhiyesine tâbi‘ Kartal nâm karye mutavattınlarından Drador v. Aleksandırı nâm zimmî tarafından ber-vech-i âtî ikrâra vekîl olup İbrahim Çelebi b. Mehmed ve Mehmed Beşe b. Musa nâm kimesneler şehâdetleriyle şer‘an vekâleti sâbit olan diğer İbrahim Çelebi b. Mehmed nâm kimesne meclis-i şer‘-i şerîfde işbu râfi‘u’s-sifr Bogos v. Makdiros nâm zimmî muvâcehesinde bi’l-vekâle ikrâr ve takrîr-i kelâm edip müvekkili merkūmun silk-i mülkünde münselik olup karye hâricinde Abdurrahman Ağa timârı toprağında vâki‘ bir tarafı Yorgi bağı ve bir tarafı el-Hâc Mehmed bağı ve bir tarafı Beylik bağı ve bir tarafı tarîk-i âm ile mahdûd tahmînen sekiz dönüm bir kıt‘a kürûmî mülk bağını tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Bogos’a yüz kıt‘a esedî guruşa bey‘ ve teslîm eylediğinde ol dahi ber-vech-i muharrer iştirâ ve tesellüm ve kabz ü kabûl eylediğinden sonra semeni olan meblağ-ı mezbûr yüz guruşu müvekkil-i merkūm mezbûr Bogos yedinden tamâmen ahz u kabz eyledi, min-ba‘d bağ-ı mahdûd-ı mezkûrda müvekkil-i merkūmun kat‘â alâka ve medhali kalmadı, müşteri-i mezbûrun mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-şehri Rebî‘i’l-âhir sene isnâ ve ışrîn ve mi'e ve elf. Şuhûdü’l-hâl: Mehmed Beşe b. Mehmed, Halil Beşe b. Ebubekir, İbrahim Çelebi b. Mehmed, Mehmed Beşe b. Musa, Mustafa Ağa b. Kasım Serdâr.