Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 585 Hüküm no: 717 Orijinal metin no: [127a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Hacı Musa’nın menzilini Hatice bt. Mehmed ile kızına satması Mahmiye-i İstanbul’da Unkapanı mevâzi‘inde Yavuzer mahallesinde sâkin İbrahim Çelebi b. el-Hâc Musa meclis-i şer‘de işbu bâ‘iseteyi’l-kitâb Hatice bt. Mehmed ve sadriye kebîre kızı Râbia bt. Hüseyin nâm hâtunlar tarafından husûs-ı âti’z-zikri tasdîke vekîli olduğu mezbûretânın zâtlarını ârifân olan Müezzin Mehmed Efendi b. Mehmed ve Musa Beşe b. Mustafa şehâdetleriyle şer‘an sâbit olan Hüseyin Çelebi b. Süleyman mahzarında ikrâr-ı tâm ve takrîr-i kelâm edip arsasının senede el-Hâc Mahmud Efendi vakfına yüz seksen akçe mukāta‘a-i kadîmesi olup ebniye[si] mülk ve hakkım olup mahalle-i mezbûrede vâki‘ bir tarafdan Musa Beşe menzili ve bir tarafdan Mehmed Beşe menzili ve bir tarafdan Hoca Rahime Hâtun menzili ve bir tarafdan tarîk-i âm ile mahdûd fevkānî iki bâb oda ve tahtânî bir bâb oda ve sofa ve bir su kuyusu ve bir mikdâr havluyu müştemil menzilimi cümle-i tevâbi‘ ve levâhıkı ile tarafeynden îcâb ve kabûlü hâvî bey‘-i kat‘î ile mezbûretân Hatice Hâtun ve Râbia Hâtun’a üç yüz altmış beş esedî guruşa bey‘ ve teslîm anlar dahi menzil-i mezbûru iştirâk-i seviy üzre iştirâ ve tesellüm ve kabûl ettiklerinden sonra semeni olan meblağ-ı mezbûr üç yüz altmış beş guruşa bana def‘ ve teslîm ben dahi yedlerinden tamâmen ahz u kabz eyledim ba‘de’l-yevm menzil-i mezkûr mezbûretân Hatice Hâtun ve Râbia Hâtun’un ale’l-iştirâki’s-seviy mülk-i müşterâları olmuşdur benim alâkam kalmadı diledikleri gibi tasarruf etsinler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc Osman b. el-Hâc Sefer, el-Hâc Ebûbekir b. Ömer Efendi, Abdi Çelebi b. Osman, Abdullah b. İsmail, Kösec Ali Beşe b. Yusuf, Süleyman Beşe [b.] Hüseyin, el-Hâc Sâlih b. Nasuh.