Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 586 Hüküm no: 718 Orijinal metin no: [127a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koni Reis v. Hristo’nun Ali Bey b. Mehmed’de alacağı olduğu Mahmiye-i İstanbul’da Çakır Ağa mahallesinde sâkin sefîne reislerinden işbu râfi‘ü’l-vesîka Koni Reis v. Hristo nâm zimmî meclis-i şer‘-i şerîf-i enverde Üsküdar kazâsında vâki‘ hâssa mandıra ahâlîsinden Ali Bey b. Mehmed mahzarında üzerine da‘vâ ve takrîr-i kelâm edip işbu hâzır bi’l-meclis Dimo v. Esteryo nâm zimmî zimmetinde yedinden müşterâ ve makbûz re’si beynimizde ma‘lûm koyun bahâsından dört yüz elli esedî guruş hakkım olup merkūm Dimo’nun dahi cihet-i mezbûreden mezbûr Ali Bey zimmetinde üç yüz kırk üç buçuk guruş hakkı olmağla mezbûr Dimo meblağ-ı merkūm üç yüz kırk üç buçuk guruş ile beni merkūm Ali Bey üzerine üçümüz bir meclisde iken havâle-i sahîha-i şer‘iyye havâle ve her birimiz dahi havâle-i mezbûreyi kabûl eylediğimizden sonra meblağ-ı mezbûrun altmış guruşunu mine’l-havâle mezbûr Ali Bey’den ahz u kabz edip bâkī iki yüz seksen üç buçuk guruşu dahi taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Ali Bey cevâbında fi’l-hakīka kaziyye vech-i muharrer üzre olup mezbûr Dimo zimmetimde cihet-i mezkûreden hakkı olan meblağ-ı merkūm üç yüz kırk üç buçuk guruş ile müdde‘î-i mezbûru benim üzerime havâle ve her birimiz dahi ba‘de’l-kabûl meblağ-ı mezbûrun altmış guruşunu kabzına mu‘terif olduğu vech üzre kendiye edâ ve bâkī iki yüz seksen üç buçuk guruşu elân zimmetimde lâzımü’l-edâ deynimdir deyû tav‘an ikrâr ve i‘tirâf etmeğin mûcebince meblağ-ı merkūm iki yüz seksen üç buçuk guruşu müdde‘î-i mezbûre edâya merkūm Ali Bey’e tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâl li sene seb‘a ve tis‘în ve elf. Şuhûdü’l-hâl: İbrahim Çelebi [b.] Ahmed, Hüseyin Çelebi b. Mehmed, Ahmed Beşe b. Abdullah, Mehmed Çelebi b. İdris.