Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 586 Hüküm no: 719 Orijinal metin no: [127a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meldon v. Minas’ın Tanaş v. İstati’ye verdiği rüşveti geri alacağı Mahmiye-i İstanbul’da Ali Paşa-yı Atîk mahallesi sükkânından işbu râfi‘ü’l-vesîka Meldon v. Minas nâm zimmî meclis-i şer‘-i şerîf-i enverde mahmiye-i mezbûrede Mahmud Paşa hanında sâkin (…) [Kürkçü] Tanaş v. İstati nâm zimmî muvâcehesinde üzerine da‘vâ ve takrîr-i kelâm edip mezbûr Tanaş Kürkçübaşı Mehmed Çelebi’nin etbâ‘ından olmağla gāib ani’l-meclis Karabet nâm zimmînin üzerine Ermeni patrikliğini ettirmek için harc-ı mu‘tâdeden mâ‘adâ mezbûr Tanaş’a bi tarîki’r-rüşve beş yüz guruş teslîm ol dahi ahz u kabz ve mesârifine sarfla istihlâk etmekle hâlâ suâl olunup meblağ-ı merkūm beş yüz guruşu [127b] bana red ve teslîme mezbûr Tanaş’a tenbîh olunmak matlûbumdur dedikde gıbbe’s-suâl mezbûr Tanaş cevâbında fi’l-hakīka ben mezbûr Mehmed Çelebi’nin etbâ‘ından olmağla husûs-ı mezbûr için harc-ı mu‘tâdeden mâ‘adâ bana beş yüz guruş teslîm ben dahi tesellüm ve kabz etmişdim lâkin müdde‘î-i mezbûr meblağ-ı merkūmu husûs-ı mezbûr için mezkûr Mehmed Çelebi’ye teslîm için bana vermekle ben dahi emrine binâen mezbûr Mehmed Çelebi’ye teslîm etmişimdir deyû def‘a mütesaddî olup lâkin mezbûr Tanaş merkūm Mehmed Çelebi’nin etbâ‘ından olmağla def‘-i mezbûru sahîh olmamağın mûcebince meblağ-ı mezbûr beş yüz guruşu müdde‘î-i merkūma red ve teslîme mezbûr Tanaş’a tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed Çelebi b. Ahmed, İbrahim Çelebi b. Ahmed, Mehmed Çelebi b. Ahmed, Mehmed Çelebi b. İdris.