Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 587 Hüküm no: 720 Orijinal metin no: [127b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdülkadir’in tedavisinde gözünü kör eden Mosi v. Avraham ile sulh olması Vilâyet-i Rumeli’nde Tatar Pazarcığı nâm kasaba ahâlîsinden olup hâlâ mahmiye-i İstanbul’da Mahmud Paşa hanında müsâfiren sâkin Mustafa b. Abdülkādir nâm kimesne meclis-i şer‘-i şerîf-i enver ve mahfil-i dîn-i münîf-i ezherde Bursa mahallâtından Kuruçeşme mahallesi sâkinlerinden olup kezâlik müsâfiren mahrûse-i Galata’ya tâbi‘ Yeniköy’de sâkin işbu bâ‘isü’l-vesîka Mosi v. Avraham nâm yahudi muvâcehesinde bi tav‘ihî ikrâr ve takrîr-i kelâm edip bundan akdem işbu sağ gözümde bir mikdâr illet olmağla mezbûr Mosi ben kehhâlim deyû târih-i kitâbdan dört ay mukaddem gözüme ilâc ederken mu‘tâda muhâlif gözüme şiş sokup hâlâ müşâhede olduğu üzre bi’l-külliye basar ve münakını? itlâf etmişidi hâlâ ber vech-i mübeyyen helâk olan işbu sağ gözümün diyetini mezbûr Mosi’den taleb ve da‘vâ eylediğimde beynimizde münâza‘ât-ı kesîre vukū‘undan sonra muslihûn tavassut edip mezbûr Mosi benimle yetmiş beş esedî guruş üzerine sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr yetmiş beş guruşu yedinden tamâmen ahz u kabz eylediğimden sonra husûs-ı mezbûra müte‘allika âmme-i da‘vâdan mezbûr Mosi’nin zimmeti ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mehmed Çavuş b. İbrahim, Halil Ağa b. İbrahim, Mehmed Ağa b. Hasan, el-Hâc Mehmed Ağa b. ( ), Mehmed Çelebi b. Ahmed.