Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 588 Hüküm no: 721 Orijinal metin no: [127b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Abdullah’ın alacaklı olduğunu ispat edememesi Mahmiye-i İstanbul’da İbrahim Paşa hamamı kurbunda sâkine Rukiye bt. Abdullah nâm hâtun tarafından husûs-ı âti’l-beyâna vekîl olup zât-ı mezbûreyi ma‘rifet-i şer‘iyye ile ârifân olan Mustafa b. Hüseyin ve Ömer Efendi b. İshak şehâdetleriyle şer‘an vekâleti sâbite olan Süleyman b. Said nâm kimesne meclis-i şer‘-i şerîf-i enverde işbu bâ‘isü’l-vesîka Mehmed b. Mehmed mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Rukiye mukaddemâ mezbûr Mehmed’e yirmi Frenk altını ikrâz ve teslîm ol dahi iktirâz ve kabz etmişidi hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz ve istihlâf edicek müvekkile-i mezbûre Rukiye’den yirmi Frenk altın istikrâz ve kabz etmeyip ol vechile meblağ-ı mezbûru merkūmeye edâ lâzım gelmediğine mezbûr Mehmed’e yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin mûcebiyle vekîl-i mezbûr bî-vech mu‘ârazadan men‘ olunup mâ vaka‘a bi’t-taleb ketb olundu. Fî evâhiri şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed b. Ahmed, Mustafa Çelebi b. Ahmed, İbrahim Çelebi b. Ahmed, Mehmed b. Mahmud ve gayruhüm.