Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 589 Hüküm no: 723 Orijinal metin no: [128a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. İvaz’ın mukátaalı menzilini Ahmed Çelebi b. Hacı Durmuş’a satması Mahmiye-i İstanbul’da Kızılminâre mahallesinde sâkin Dergâh-ı âlî yeniçerilerinin çavuşlarından fahrü’l-eşbâh Ali Ağa b. İvaz meclis-i şer‘-i şerîf-i enverde birâderi dâmâdı işbu bâ‘isü’l-kitâb Ahmed Çelebi b. el-Hâc Durmuş mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahmiye-i mezbûrede Unkapanıkapısı dâhilinde İbn Merras? mahallesinde vâki‘ arsası senede mahalle-i mezbûre müezzinine iki yüz akçe mukāta‘a-i kadîme ile taht-ı tasarrufumda olup ve ebniyesi mülküm olan bir tarafdan ba‘zan Fâtıma Hâtun tasarrufunda olan menzil ve ba‘zan müezzine meşrûta vakıf menzil ve bir tarafdan ba‘zan Abdülkādir Efendi menzili ve ba‘zan Şaban Çelebi veresesi tasarruflarında olan menzil ve bir tarafdan tarîk-i hâs ve bir tarafdan tarîk-i âm ile [mahdûd] bir bâb fevkānî kebîr oda ve bir bâb tahtânî sagīr oda ve kenîf ve yine karşı be karşı fevkānî iki oda ve ortalarında bir tahtapûş ve dehliz ve tahtânî bir matbah ve zîr-i zemînde kârgîr bir kuyu mahzen ve bir kenîf ve bir mikdâr cüneyne ve bir su kuyusunu müştemil menzilimin ebniye-i mezkûresini bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bey‘-i bâtt-ı kat‘î ile merkūm Ahmed Çelebi’ye beş yüz esedî guruşa bey‘ ve temlîk ve teslîm ve arsa-i mezbûresini mütevellîsi izniyle meccânen ferâğ ve tefvîz ol dahi iştirâ ve tesellüm ve tefevvüz ve kabûl ettiğinden sonra semeni olan meblağ-ı mezbûr beş yüz esedî guruşu yedinden tamâmen ahz u kabz eyledim min ba‘de vechen mine’l-vücûh menzil-i mezbûrda alâka ve medhalim kalmayıp ebniyesi merkūm Ahmed Çelebi’nin mülk-i müşterâsı ve arsası hakk-ı müfevvezi olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc Hüseyin Çelebi b. Üveys, Süleyman Beşe b. Ramazan, Veli Bey b. İbrahim, el-Hâc Hasan b. Receb, Abdülkādir Efendi el-İmâm, Ahmed Efendi b. Mustafa el-Müezzin, Mehmed Çelebi b. Şaban, el-Hâc İsmail [b.] Hacı Ömer, Ahmed Beşe b. Abdullah, el-Hâc Mustafa b. Maden.