Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 589 Hüküm no: 724 Orijinal metin no: [128a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hanım’ın Ali Çelebi b. Abdullah’ta alacağı olduğu Mahmiye-i İstanbul’da Suhte Sinan mahallesi sâkinelerinden Rahime bt. ( ) nâm hanım tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Ahmed Çelebi b. Hasan ve Yusuf [b.] Abdullah nâm kimesneler şehâdetleriyle şer‘an sâbit olan Yusuf Ağa b. Abdullah nâm kimesne meclis-i şer‘-i şerîf-i enverde sâbıkan Bağdad-ı behişt-âbâd vâlisi olan İbrahim Paşa’nın hâlâ çiftlik kethüdâsı olan Ali Çelebi b. Abdullah mahzarında üzerine bi’l-vekâle da‘vâ ve takrîr-i kelâm edip müvekkile-i mezbûre Rahime Hanım’ın mezbûr Ali Çelebi zimmetinde cihet-i karz-ı şer‘îden yüz yirmi esedî guruş hakkı olmağla hâlâ suâl olunup meblağ-ı mezbûru müvekkile-i mezbûre için bana teslîme tenbîh olunmak matlûbumdur dedikde gıbbe’s-suâl mezbûr Ali Çelebi cevâbında fi’l-hakīka müvekkile-i mezbûre Rahime Hanım’a cihet-i mezkûreden ber vech-i muharrer yüz yirmi esedî guruş zimmetinde lâzımü’l-edâ deyni olduğunu bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûr [yüz] yirmi guruşu müvekkile-i mezbûre için vekîl-i mezbûra edâ ve teslîme mezbûr Ali’ye tenbîh birle mâ vaka‘a bi’t-taleb ketb [olundu]. Fi’l-yevmi’s-sânî min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. Ahmed, Mehmed b. İdris, Ali b. Bâli.