Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 590 Hüküm no: 725 Orijinal metin no: [128b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın İbrahim b. Mehmed’de alacağı olduğu Mahmiye-i İstanbul’da Efdalzâde mahallesi sâkinlerinden bâ‘isü’l-kitâb Mustafa b. Abdullah nâm kimesne meclis-i şer‘-i şerîfde mahmiye-i mezbûrede Sultân Selim câmi‘-i şerîfi kurbunda pazarcı olan İbrahim b. Mehmed nâm kimesne mahzarında üzerine da‘vâ ve takrîr-i kelâm [edip] mezbûr İbrahim zimmetinde cihet-i karz-ı şer‘îden on yedi esedî guruş hakkım olmağla hâlâ suâl olunup meblağ-ı mezbûr on yedi guruşun alıverilmesi matlûbumdur dedikde gıbbe’s-suâl mezbûr İbrahim cevâbında fi’l-hakīka kaziyye vech-i mübeyyen üzre olup müdde‘î-i mezbûra cihet-i mezkûreden zimmetimde vâcibü’l-edâ ve lâzımü’l-kazâ on yedi guruş deynim vardır deyû bi tav‘ihî ikrâr ve i‘tirâf etmeğin alâ i‘tirâfihî meblağ-ı mezbûr on yedi guruş müdde‘î-i mezbûra edâ ve teslîme mezbûr İbrahim’e tenbîh birle mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. Abdullah, Kasımpaşalı Mustafa, Mehmed b. Ali, Ebûbekir b. Hüseyin, Mehmed Çelebi b. İdris.