Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 591 Hüküm no: 727 Orijinal metin no: [128b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed b. Mehmed’in Ali b. Veli’den kefalet sebebiyle alacağı olduğu Mahmiye-i İstanbul’da Sinan Paşa mahallesinde sâkin bâ‘isü hâze’l-kitâb el-Hâc Ahmed b. Mehmed meclis-i şer‘-i şerîf-i enverde mahrûse-i Galata müzâfâtından kasaba-i Tophâne’de Perviz Ağa mahalle[sinde] sâkin Ali b. Veli nâm kimesne mahzarında üzerine da‘vâ ve takrîr-i kelâm edip gāib ani’l-meclis Yusuf b. Abdullah nâm kimesne zimmetinde yedimden müşterâ ve makbûz levni ve zirâ‘ı beynimizde ma‘lûm bogasi bahâsından iki yüz esedî guruş hakkıma mezbûr Ali tarafından emr ve kabûlü hâviye kefâlet-i sahîha-i şer‘iyye ile kefîl olmağla hâlâ suâl olunup kefâlet-i mahkiyesine binâen meblağ-ı mezbûr iki yüz esedî guruşu bana edâ ve teslîme tenbîh olunmak matlûbumdur dedikde gıbbe’s-suâl mezbûr Ali cevâbında fi’l-hakīka müdde‘î-i mezbûr el-Hâc Ahmed’e ber vech-i muharrer cihet-i kefâletden iki yüz esedî guruş zimmetinde lâzımü’l-edâ deyni olduğunu bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûr iki yüz esedî guruşu kefâletine binâen müdde‘î-i mezbûr el-Hâc Ahmed b. Mehmed’e tamâmen edâ ve teslîm etmek üzre merkūm Ali’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc Mehmed Ağa b. İbrahim, Mustafa b. Süleyman, Ahmed Ağa b. Ahmed, İbrahim Çelebi b. Ahmed, İbrahim Çelebi b. Abdullah.