Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 592 Hüküm no: 728 Orijinal metin no: [129a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Beşe b. Hasan’ın kendisini yaralayan Mehmed Beşe b. Ahmed ile sulh olması Mahmiye-i İstanbul’da Neslihan Şah Sultân mahallesinde sâkin Şaban Beşe b. Hasan nâm kimesne meclis-i şer‘-i şerîf-i enverde Dergâh-ı âlî yeniçerilerinin altmış üçüncü solaklar odasına mahsûs oda yoldaşlarından gāib ani’l-meclis Mehmed Beşe b. Ahmed tarafından husûs-ı âti’l-beyâna vekîl olduğu Ebûbekir Beşe b. İbrahim ve Ahmed Beşe b. Mustafa şehâdetleriyle vekâleti şer‘an sâbit olan Hasan Beşe b. Mehmed mahzarında ikrâr ve takrîr-i kelâm edip mezbûr Mehmed Beşe târih-i kitâbdan iki gün mukaddem mahmiye-i mezbûrede Yenibahçe’de vâki‘ Sulukule önünde beyne’s-salâteynde yoluma gelip bi gayri hakkın bana şütûm-ı galîza ile şetm eylediğinden mâ‘adâ bir taş ile ağzıma vurup üst tarafında üç dişimi ihrâc ve beni mecrûh etmekle ben dahi bundan akdem işbu müşâhede olunup ihrâc olunan üç dişimin diyetine mezbûr Mehmed Beşe’den taleb ve da‘vâ eylediğimde ol dahi inkâr etmeğin beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûrumdan mezbûr Mehmed Beşe sekiz yüz akçe üzerine benimle sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr sekiz yüz akçeyi mezbûr Mehmed yedinden tamâmen ahz u kabz edip husûs-ı mezbûra ve mâ tehaddese minhümâ müte‘allika âmme-i da‘vâdan ben mezbûr Mehmed Beşe’nin zimmetini ibrâ ve iskāt edip ol dahi bedel-i sulh olmak üzre def‘ ve teslîm eylediği sekiz yüz akçeye müte‘allika âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Hasan Beşe b. Mehmed, Yazıcı Mustafa Beşe b. İbrahim, Mehmed Beşe b. Ebûbekir Başeski, Ali Beşe b. Osman, Mehmed Beşe b. Bektaş el-Mübâşir, İbrahim Çelebi [b.] Ahmed.