Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 592 Hüküm no: 729 Orijinal metin no: [129a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Mustafa’nın boşandığı kocası Mustafa Çelebi b. Zülfikár’da alacağı olduğu Mahmiye-i İstanbul’da Alacamescid mahallesi sâkinelerinden bâ‘isetü’l-kitâb Sâliha bt. Mustafa tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân el-Hâc İbrahim b. Mustafa ve Osman Efendi b. Mehmed şehâdetleriyle şer‘an sâbit olan li ebeveyn er karındaşı Süleyman Çelebi nâm kimesne meclis-i şer‘-i şerîfde müvekkile-i mezbûrenin zevc-i mutallıkı Mustafa Çelebi b. Zülfikār mahzarında üzerine bi’l-vekâle da‘vâ ve takrîr-i kelâm edip yedimde olan işbu nafaka hücceti nâtıka olduğu üzre müvekkilem mezbûreden mütevellid ve mezbûr Mustafa Çelebi’nin firâşından hâsıl İbrahim ve Mehmed ve Fâtıma nâm olan sıgārı için mukaddemâ hâkimü’ş-şer‘ takdîr ve izn-i hâkimle âhardan istidâne ve nafaka ve kisvelerine harc ve sarf olunup beher yevm üçüne on sekiz akçe nafaka-i mefrûzalarından sene-i sâbıkanın Zilhiccesi gurresinden târih-i kitâb şehr gurresine gelince on ayda işlemiş olup zimmetinde müctemi‘ olan beş bin iki yüz seksen akçei merkūmdan taleb eylediğimde edâdan imtinâ‘ eder hâlâ suâl olup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mustafa Çelebi cevâbında kaziyye vech-i muharrer üzre olup meblağ-ı mezbûr beş bin iki yüz seksen akçe zimmetinde ber vech-i muharrer müctemi‘ olup hâlâ zimmetinde vâcibü’l-edâ deyni olduğunu ikrâr ve i‘tirâf etmeğin mûcebince ber vech-i mezkûr işlemiş olan meblağ-ı mezbûr beş bin iki yüz seksen akçeyi müvekkile-i mezbûre için vekîl-i mezbûra edâ ve teslîme mezbûr Mustafa Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc İbrahim b. Mustafa, Osman Efendi b. Mehmed, İbrahim Çelebi b. Ahmed, Mehmed Çelebi b. İdris, Mehmed b. Şaban.