Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 593 Hüküm no: 730 Orijinal metin no: [129a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Musli b. Hacı Mehmed’in Ahmed Beşe b. Musa’da alacağı olduğu Medîne-i Galata’ya tâbi‘ kasaba-i Tophâne’de Ebülfazl mahallesi sükkânından işbu râfi‘ü’l-kitâb el-Hâc Musli b. el-Hâc Mehmed meclis-i şer‘-i şerîf-i enverde sefîne reislerinden Ahmed b. Musa nâm kimesne mahzarında üzerine da‘vâ ve takrîr-i kelâm edip mezbûr Ahmed Beşe fırkate ta‘bîr olunur sefînemde reis olmağla cezîre-i Girit’den zeytin yağı iştirâ ve mahmiye-i İstanbul’a getirmek için bundan akdem mezbûr Ahmed Beşe’ye bin altı yüz elli beş esedî guruş teslîm ol dahi ba‘de’l-ahz cezîre-i mezbûreye varıp meblağ-ı mezbûr ile ma‘lûmü’l-mikdâr zeytin yağı iştirâ ve sefîne-i mezbûreye tahmîl eylediğinden sonra sefîne-i mezbûre yine cezîre-i mezbûre önünde bi emrillâhi te‘âlâ pârelendikde mezbûr Ahmed Beşe iki yüz elli kantar zeytin yağı ve kırk guruş kıymetli bir filika ve yetmiş guruş kıymetli iki sefîne direği ve yüz yirmi sekiz guruş kıymetli dört sefîne demiri ve sâir [129b] sefîne âlâtını deryâdan ihrâc ve âhara bey‘ ve semenini kendi mesârifine sarfla istihlâk etmekle kıymet-i şer‘iyyelerini mezbûrdan taleb ve da‘vâ eylediğimde beynimizde münâza‘ât-ı kesîre cereyânından sonra muslihûn tavassut edip da‘vâ-yı mezkûrumdan merkūm Ahmed Beşe ile beni beş yüz altmış guruş üzerine sulh eylediklerinde ben dahi sulh-i mezbûru kabûl ve mâ‘adâsına müte‘allika âmme-i da‘vâdan mezbûrun zimmetini ibrâ ve iskāt edip mezbûr Ahmed Beşe bedel-i sulh-i mezbûrun üç yüz guruşunu oğlum Hüseyin zimmetinde hakkı olup mezbûr Hüseyin mezbûr Ahmed Beşe’ye teslîm için bi tarîki’l-emâne bana teslîm ben dahi ahz u kabz ve kendi mesârifime sarf edip ol vechile zimmetimde hakkı olan üç yüz guruşa ve altmış dört guruşunu beynimizde ma‘lûm zeytin yağı ve buğday ve dakīk bahâlarından hakkı olan altmış dört guruşa takās, ben dahi mukāssa ve kabûl edip yüz doksan altı guruşu bâkī kalmağın hâlâ suâl olunup bedel-i sulh-i mezbûrdan bâkī kalan meblağ-ı merkūmun alıverilmesi matlûbumdur dedikde gıbbe’s-suâl mezbûr Ahmed Beşe cevâbında fi’l-hakīka kaziyye bâlâda tafsîl ve beyân ve şerh ve ayân olduğu [üzre] olup bedel-i sulh-i merkūmdan bâkī kalan meblağ-ı mezbûr yüz doksan altı guruş elân zimmetinde lâzımü’l-edâ deyni idiğini tav‘an ikrâr ve i‘tirâf etmeğin mûcebince meblağ-ı bâkī-i mezbûr yüz doksan altı guruşu müdde‘î-i mezbûra edâya merkūm Ahmed Beşe’ye tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Ahmed, Mustafa Çelebi b. Ahmed, Hasan b. Mehmed, Mehmed b. İdris.