Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 594 Hüküm no: 731 Orijinal metin no: [129b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Musa’nın vekâleten köle satışından Ali Çelebi b. Hacı Musli’nin vârislerine borçlu olduğu Mahrûse-i Galata’ya tâbi‘ kasaba-i Tophâne’de Ebülfazl mahallesi sükkânından iken bundan akdem vefât eden Ali Çelebi b. el-Hâc Musli b. el-Hâc Mehmed’in verâseti zevce-i metrûkesi Fâtıma Hâtun bt. Abdülganî ile babası mezbûr el-Hâc Musli’ye ve vâlidesi Hanım bt. Bâli nâm hâtuna ve evlâd-ı sıgārı Mustafa ve Hanîfe ve Ayşe’ye münhasıra olduğu şer‘an zâhir ve müte‘ayyin oldukdan sonra kendi tarafından asîl ve sıgār-ı mezbûrûnun ced ve velîleri ve mezbûretân Fâtıma ve Hanım taraflarından husûs-ı âti’z-zikre sâbitü’l-vekâle vekîlleri olan mezbûr el-Hâc Musli meclis-i şer‘-i şerîf-i enverde sefîne reislerinden Ahmed Beşe b. Musa mahzarında vesâyeten ve velâyeten ve vekâleten üzerine da‘vâ ve takrîr-i kelâm edip oğlum müteveffâ-yı mezbûrun terekesinden evsâfı beynimizde ma‘lûm Nikefora nâm bir re’s gulâmı götürüp mahrûse-i Kandiye’de oğlum Hüseyin nâm kimesneye teslîm etmek için ve Şâhin nâm gulâmı mısr-ı Kahire’de âhara bey‘ ve semeni ile Mısır metâ‘ı iştirâ ve bana îsâl için merkūm Ahmed Beşe’ye bi tarîki’l-emâne def‘ ve teslîm edip ol dahi ahz u kabz eyledikden sonra mezbûr Nikefora’yı merkūm Hüseyin’e teslîm etmeyip yüz kırk guruşa âhara bey‘ ve zikr olunan Şâhin semen-i misli olan üç bin beş yüz Mısrî paraya âhara bey‘ ve semenlerini kendi mesârifine sarfla istihlâk eyledikden sonra mezbûr Nikefora’nın bey‘ini mücîz olmuşdur hâlâ suâl olunup mezbûrân Nikefora ve Şâhin’in semenleri olan meblağayn-i mezbûreynin mezbûr Ahmed Beşe’den alıverilmesi matlûbumdur dedikde gıbbe’s-suâl merkūm Ahmed cevâbında fi’l-hakīka kaziyye bâlâda tafsîl ve beyân ve şerh ve ayân olunduğu üzre olup merkūmân Nikefora ve Şâhin’in semenleri olan yüz kırk guruş ile üç bin beş yüz Mısrî parayı kendi mesârifime sarfla istihlâk eyledim meblağayn-i mezbûreyn verese-i mezbûrûna zimmetimde deynimdir deyû ikrâr ve i‘tirâf etmeğin mûcebince meblağayn-i mezbûreyni müdde‘î-i mezbûra edâ[ya] merkūm Ahmed’e tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Eş-Şuhûdü’s-sâbikūn.