Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 595 Hüküm no: 733 Orijinal metin no: [130a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Sefer’in alacak davasında Ayşe bt. Mustafa ile sulh olması Mahmiye-i İstanbul’da Debbâğ Yunus mahallesi sâkinlerinden Ahmed Çelebi b. Sefer nâm kimesne meclis-i şer‘-i şerîf-i enverde ve mahfil-i dîn-i münîf-i ezherde mahmiye-i mezbûrede el-Hâc Timur mahallesi sâkinelerinden bâ‘isetü hâzihi’l-kitâb Ayşe Hanım bt. Mustafa nâm hâtun mahzarında ikrâr ve takrîr-i kelâm edip mezbûr Ayşe Hanım’ın zevc-i mutallıkı gāib ani’l-meclis Halil Çavuş b. Mehmed nâm kimesne zimmetinde cihet-i deyn-i şer‘îden yüz guruş hakkım olup meblağ-ı mezbûru mezbûre Ayşe Hanım’dan üçümüz bir meclisde iken bana havâle-i sahîha-i şer‘iyye ile havâle edip ben dahi ba‘de’l-kabûl meblağ-ı mezbûr yüz guruşu mezbûre Ayşe Hanım’dan taleb ve da‘vâ eylediğimde ol dahi havâle-i mezkûreyi münkire olmağın beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûrumdan mezbûre Ayşe Hanım yetmiş esedî guruş üzerine benimle sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr yetmiş esedî guruşu [Ayşe] Hanım yedinden tamâmen ahz u kabz eylediğimden sonra meblağ-ı bâkī otuz guruşa müte‘allika âmme-i da‘vâdan mezbûre [Ayşe] Hanım’ın zimmetini ibrâ-i âm [ile ibrâ ettim dedikde] mâ vaka‘a bi’t-taleb [ketb olundu]. Fi’l-yevmi’s-sâdis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mustafa b. Abdullah, Süleyman Çelebi b. Mehmed, Ramazan Çelebi b. Mehmed, Yusuf Bey b. Abidin.