Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 596 Hüküm no: 734 Orijinal metin no: [130a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Abdürrauf ile Salih b. Abdullah’ın boşanması Mahmiye-i İstanbul’da Alem Bey mahallesinde sâkine Havva bt. Abdürrauf nâm hâtun meclis-i şer‘-i şerîfde Sâlih b. Abdullah nâm kimesne mahzarında üzerine da‘vâ ve takrîr-i kelâm edip bundan akdem mezbûr Sâlih zevcim olup târih-i kitâbdan kırk gün mukaddem zimmetinde mütekarrir ve ma‘kūdun-aleyh olan beş yüz akçe mehr-i müeccelim mukābelesinde Mushaf-ı şerîf’den bana bir cüz-i şerîf verip ben dahi yedinden kabz ve kabûl eylediğimden sonra mezbûr irâdetin elinde olsun deyû beni tahyîr edip ben dahi ol meclisde nefsimi ihtiyâr etmekle mezbûr Sâlih’den mutallaka olmuşiken hâlâ mezbûr Sâlih benimle zevciyyet mu‘âmelesi etmek murâd eder mezbûr Sâlih’e suâl olunup yed-i mubtılasının kasr ve izâlesine tenbîh olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda mahalle-i mezbûre imâmı İbrahim Efendi b. Ali ve Müezzin Hasan Halîfe b. Hüseyin nâm kimesneler li ecli’ş-şehâde meclis-i şer‘a hâzırân olup istişhâd olundaklarında fi’l-hakīka mezbûr Sâlih târih-i kitâbdan kırk gün mukaddem bizim huzûrumuzda zevcesi mezbûre Havva’ya zimmetinde mütekarrir ve ma‘kūdun-aleyh olan beş yüz akçe mehr-i müeccel mukābelesinde Mushaf-ı şerîf’den bir cüz-i şerîf verip ol dahi kabz ve kabûl eylediğinden sonra mezbûr Sâlih zevcesi mezbûre Havva’ya irâdetin elinde olsun deyip merkūme Havva’yı tahyîr edip merkūme Havva dahi ol meclisde nefsini ihtiyâr etmekle mezbûre Havva merkūm Sâlih’den mutallaka olmuşdur biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Efendi b. Ali, Musa b. Hüseyin, Mehmed b. Süleyman, Derviş b. Abdullah, İsmail Çelebi b. Resul, İbrahim Çelebi b. Ahmed.