Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 213 Hüküm no: 325 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe'nin bağını, vekili Hasan Beşe'nin Ahmed Çelebi'ye sattığı Yine vekîl-i mezbûr Hasan Beşe meclis-i şer‘de medîne-i Üsküdar nevâhîsinden Adalar nâhiyesi tâbi‘inden Kartal nâm karyede sâkin Ahmed Çelebi b. Şa‘bân mahzarında ikrâr ve takrîr-i kelâm edip müvekkilim mezbûr Ali Beşe’nin akd-i âtî sudûruna değin silk-i mülkünde münselik olan karye-i mezbûrede Eskibağlar’da bir tarafı Hanakar zimmî bağı, bir tarafı Pandeli zimmî bağı, bir tarafı Alkarazoğlu bağı, bir tarafı tarîk-i âm ile mahdû[d] ve mümtâz tahmînen üç bin çöp mülk bağı vekâletim hasebiyle mezbûr Ahmed Çelebi b. Şa‘bân’a bey‘-i bâtt-ı sahîh-i şer‘î ile on dört buçuk guruşa bey‘ ve teslîm ve temlîk ol dahi ber-vech-i muharrer iştirâ ve temellük ve kabz ve kabûl eyledikden sonra semeni olan meblağ-ı mezbûr on dört buçuk guruşu mezbûr Ahmed Çelebi yedinden tamâmen ahz u kabz eyledim, fîmâ-ba‘d bağ-ı mahdûd-ı mezbûr, merkūm Ahmed Çelebi’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde ketb olundu. Şuhûdü’l-hâl: el-Hâc Mehmed b. Yakub, Mustafa Beşe b. Mehmed, Hasan Çelebi b. Ali, Mehmed Çelebi b. Musa Bey, Musa Bey b. Mehmed, Ali Beşe b. Mehmed , Mehmed Beşe b. Abdullah.