Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 597 Hüküm no: 735 Orijinal metin no: [130b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in nafaka ve mehir hususunda kendisini boşayan Hacı Ahmed b. Hacı İvaz’ın zimmetini ibrâ etmesi Nikâh, kabz ikrâr an mahalleti Hoca Hayreddin. Mahmiye-i İstanbul’da Hoca Hayreddin mahallesinde sâkine Ayşe bt. Mehmed nâm hâtun zâtı ma‘rifet-i şer‘iyye ile ârifân Mehmed Çelebi b. Mustafa ve Mahmud Beşe b. Ahmed ta‘rîfleriyle mu‘arrefe oldukdan sonra meclis-i şer‘-i şerîf-i enverde zevc-i dâhili bâ‘isü hâze’l-kitâb el-Hâc Ahmed b. el-Hâc İvaz nâm kimesne mahzarında bi’t-tav‘i’s-sâf ikrâr ve i‘tirâf edip zevcim mezbûr el-Hâc Ahmed beni bâyinen tatlîk etmekle zimmetinde mütekarrir ve ma‘kūdun-aleyh olan beş yüz akçe mehr-i müeccelimi ve rızâmız ile iddet-i nafaka-i ma‘lûmemi ve me’ûnet-i süknâm için üç yüz akçe ki cem‘an sekiz yüz akçeyi mezbûr el-Hâc Ahmed bana edâ ve teslîm ben dahi bi’t-tamâm yedinden ahz u kabz eylediğimden sonra hukūk-ı zevciyyete ve gayra müte‘allika cemî‘ da‘vâdan merkūm el-Hâc Ahmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm da‘vâ ve nizâ‘ım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mehmed Çelebi b. Mustafa, es-Seyyid Sâdık Çelebi el-Müezzin, Mustafa Çelebi b. ( ), Çukadâr Mustafa, Mahmud Beşe b. Ahmed, el-Hâc Mehmed b. Hüseyin.