Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 597 Hüküm no: 736 Orijinal metin no: [130b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Odabaşı b. Mahmud’un alacağına Ömer Çelebi’nin kefil olduğunu ispat edemediği Dergâh-ı âlî -dâme mahfûfen bi’l-me‘âlî- yeniçerilerinin doksan üç cemâ‘atine mahsûs Osman Odabaşı b. Mahmud nâm kimesne meclis-i şer‘-i şerîf-i enverde mahmiye-i İstanbul’da Karagümrük kurbunda Öküz Mehmed Paşa mahallesinde sâkin terzi Ömer Çelebi b. Mustafa mahzarında üzerine da‘vâ ve takrîr-i kelâm edip mahmiye-i mezbûrede Çıkrıkçı Kemal mahallesinde sâkin olup gāib ani’l-meclis Mehmed b. Mehmed nâm kimesne zimmetinde işbu yedimde olan memhûr deyn temessükü nâtık olduğu üzre cihet-i karz-ı şer‘îden otuz beş guruş hakkım olmağla merkūm Ömer meblağ-ı mezbûra tarafından emr ve kabûlü hâviye kefâlet-i sahîha-i şer‘iyye ile kefîl olmuşdu hâlâ suâl olunup bi hükmi’l-kefâle meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl mezbûr Ömer cevâbında gāib-i merkūm Mehmed’in ancak nefsine kefîl oldum deyû ikrâr meblağ-ı mezbûra kefâletini inkâr edicek müdde‘î-i mezbûr[dan] müdde‘âsına beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûr Osman Beşe’nin gāib-i mezbûr zimmetinde olan otuz beş guruş hakkına ber vech-i muharrer kefîl olmayıp ol vechile müdde‘î-i mezbûra edâsı lâzım deyni olmadığına mezbûr Ömer[‘e] yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘î-i mezbûr Osman Beşe mezbûr talebinden men‘ olundukdan sonra gāib-i mezbûru merkūm Ömer ikrârı mûcebince meclis-i şer‘a ihzârına birle mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Abdullah Efendi b. el-Hâc Veli, İbrahim Efendi el-Kâtib, Hasan Beşe b. ( ), el-Hâc Abdi b. Ebûbekir, Ahmed Çelebi b. Hasan, İbrahim Çelebi b. Ahmed.