Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 598 Hüküm no: 737 Orijinal metin no: [130b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yorgi’nin Mihal v. Aleksi’nin vârisi olduğu iddiasının reddi Husûs-ı âti’l-beyânın istimâ‘ı için fermân-ı âlî sâdır olmağın Üsküdar kazâsına tâbi‘ Kartal karyesi sükkânından İstati v. Yorgi nâm zimmî meclis-i şer‘-i şerîf-i enverde karye-i mezbûrede sâkin iken bundan akdem hâlik olan Mihal v. Aleksi’nin zevce-i metrûkesi Sofya bt. Yani ile sulbiye sagīre kızı Sultana’nın vasiyy-i mansûbu olan Dimo v. Todori muvâcehelerinde üzerlerine da‘vâ ve takrîr-i kelâm edip ben hâlik-i mezbûr Mihal’in li ebeveyn ammi oğlu ve usûbet-i nesebiyye cihetinden vârisi olup benim babam mezbûr Yorgi hâlik-i mezbûr Mihal’in babası mezbûr Aleksi ile li ebeveyn karındaşlar olup babaları ismi Dimo hâlik-i mezbûr Mihal’in verâseti zevce-i metrûkesi mezbûre Sofya ve sagīre kızı mezbûre Sultana ve usûbet-i nesebiyye cihetinden ber vech-i muharrer bana münhasıra olmağla hâlâ mezbûr işbu Sofya ile vasiyy-i merkūm hâlik-i mezbûrun cümle terekesine vaz‘-ı yed eder bana âid olan hisse-i irsiyyemi teslîmden imtinâ‘ etmeleriyle hâlâ mezbûrâna suâl olunup hisse-i merkūmun alıverilmesi matlûbumdur dedikde müdde‘î-i mezbûr nesebini beyânında cedd-i a‘lâsında cedde-i ulyâsını bilmem deyû zikr etmeyip tashîh-i da‘vâ etmemekle da‘vâsı meşrû‘a olmayıp mezbûrân Sofya ve Dimo’ya şer‘an suâl dahi teveccüh etmemeğin mûcebince mezbûr İstati bilâ-beyân bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: (…), Çorlulu Mehmed Çelebi, İbrahim Çelebi b. Ahmed, Veli Çavuş b. Musli el-Mübâşir, Aleksandri v. Nikola, Kanilo v. İstaşno, Andriye v. Nikola ve gayruhüm mine’l-hâzırîn.