Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 599 Hüküm no: 738 Orijinal metin no: [131a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Vasil’in Yorgi v. Mihal’in vârislerine olan borcuna karşılık menzilini takas etmesi Mahrûse-i Galata’da Karakikapısı dâhilinde Sultân Bayezid mahallesinde sâkin Yorgi v. Vasil nâm zimmî meclis-i şer‘-i şerîf-i enverde mahalle-i mezbûrede sâkin iken bundan akdem hâlik olan Varilci Yorgi v. Mihal nâm zimmînin verâseti zevce-i metrûkesi Asanina bt. Deryako ve sulbiye kebîre kızları Fotini ve Despina ve sulbiye sagīre kızı Hırosine’ye münhasıra olduğu şer‘an mütehakkik oldukdan sonra mezbûre Asanina ile sagīre-i mezbûrenin tesviye-i emrine kıbel-i şer‘den vasiyy-i mansûbu olan mezbûretân Fotini ve Despina taraflarından husûs-ı âti’l-beyâna vekîl-i müseccelleri olan işbu bâ‘isü’l-vesîka Pilaş v. Dimitri nâm zimmî muvâcehesinde ikrâr-ı tâm ve takrîr-i kelâm edip mezbûr Pilaş’ın yedinde olan işbu hükm-i hüccet-i şer‘iyye nâtıka olduğu üzre verese-i mezbûruna beynimizde ilm-i şer‘îyle ma‘lûm fıçılar ve variller ve sâir varilci âlât-ı bahâsından zimmetimde vâcibü’l-edâ altmış bir bin akçe deynim olup meblağ-ı mezbûrun on iki bin akçesini kendilere edâ ve teslîm edip bâkī kırk dokuz bin akçe zimmetimde kalmağın hâlâ merkūm Mustafa Paşa vakfından icâreteyn-i ma‘lûmeteyn ile taht-ı tasarrufumda olup mahalle-i mezbûrede vâki‘ bir tarafdan Kostantin menzili ve bir tarafdan meydan ve bir tarafdan bakkal Andriye menzili ve bir tarafdan tarîk-i âmla mahdûd fevkānî iki bâb oda ve tahtânî iki bâb ve bir sofa ve bir kapı ve bir mikdâr havluyu müştemil menzilimi izn-i mütevellî ile kırk dokuz bin akçe bedel mukābelesinde verese-i mezbûrûna ferâğ ve tefvîz anlar dahi ber vech-i muharrer tefevvüz ve kabûl ve bedel-i merkūm kırk dokuz bin akçeyi zimmetimde kendilere deynim olan meblağ-ı bâkī-i mezbûr kırk dokuz bin akçeye takās edip anlar dahi mukāssa ve kabûl eylediler min ba‘d menzil-i mezbûr verese-i merkūmûnun dâhil-i havza-i tasarrufları olmuşdur dedikde gıbbe’t-tasdîki’l-mu‘teberi’l-vicâhî mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İslâm Çavuş el-Mübâşir, İbrahim Çelebi b. Ahmed, Ali b. Bâli, Ebûbekir b. Hasan, Mehmed Efendi el-İmâm, Arabzâde Ahmed Efendi, Ahmed Çelebi el-Attâr ve gayruhüm mine’l-huzzâr.