Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 243 Hüküm no: 377 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lasko v. Kostantin'e ait ev, bahçe ve duvarlarında kimsenin hakkı olmadığı Medîne-i Üsküdar’a muzâfe Adalar nâhiyesine tâbi‘ Heybeliadası nâm karye sâkinlerinden iken bundan akdem hâlik olan Uzguri v. Kiryazi nâm zimmînin verâseti zevce-i metrûkesi Zoli bt. Hristo nâm Nasrâniye ile sulbiye kebîre kızı Maryora’ya ve li-ebeveyn er karındaşı Todoş’un sulbî kebîr oğulları Yorgo v. Pandeli ve Yanaki’ye münhasıra olduğu şer‘an zâhir ve nümâyân oldukdan sonra mezbûrûn Zoli ve Maryora ve Yorgo ve Pandeli ve Yanaki meclis-i şer‘-i şerîf-i enverde işbu rafi‘ü’l-kitâb Lasko v. Kostantin nâm zimmî muvâcehesinde her biri ikrâr ve takrîr-i kelâm edip mezbûr Lasko’nun bundan akdem hâlike olan Arhondapola bt. Angeli nâm Nasrâniyeden kendüye isâbet ve intikāl eden karye-i mezbûrede vâki‘ bir tarafı merkūm Lasko’nun kendü mülk-i âharı ve bir tarafı bizim mülkümüz ve bir tarafı ba‘zen Asaki ve ba‘zen Palaolo mülkleri ve bir tarafı sâhil-i bahr ile mahdûd dört bâb fevkānî oda ve iki sofa ve bir matbah ve üç mahzen ve eşcâr-ı müsmire ve gayr-ı müsmireyi hâvî bağçe ve bizim ile müşterek bi'r-i mâyı müştemil bir kıt‘a mülk menzilde ve menzil ve bağçede ve duvarlarında bizim kat‘â alâka ve medhalimiz yokdur, merkūm Lasko’nun mülk-i mevrûsu ve hakk-ı sırfıdır, keyfe mâ teşâ ve tahtâr mutasarrıf olsun dediklerinde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Saferi’l-hayr li-sene tis‘a ve ışrîn ve mi'e ve elf. Şuhûdü’l-hâl: İbrahim Efendi b. Mehmed, İsmail Çelebi b. Şahin, Ali Beşe b. Hüseyin, Berber Hasan Çelebi b. Mustafa, Dimitraki Reis v. Yanaki, Moskona v. Şamatari, Uzguri v. Karakil, Asaki v. Aleksa, Yorgaki v. Kostanti, Ananosti ve Palaş v. Oskoni, Yanaki v. Manol, Tarandafil v. Yamandi.