Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 244 Hüküm no: 378 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere hazırlanan donanma için inşa edilecek gemi sayısının bildirilmesinden sonra bu sayıya uygun miktarda levend çağrılması Yâ Fettâh Mefâhirü’l-kuzât ve’l-hükkâm ma‘âdinü’l-fezâil ve’l-kelâm Şile’den Bozcaada’ya varınca Rumeli ve Anadolu taraflarında vâki‘ olan kādılar -zîde fazluhum- ve mefâhirü’l-emâsil ve’l-akrân iskele emînleri ve sâir a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ evvel-bahâr-ı meymenet-âsârda rûy-ı deryâya ihrâc olunacak Donanma-yı hümâyûnum kalyonları için şimdiden levendât tedâriki mühim ve muktezî olmağın lâkin iktizâ eden levendât Rumeli ve Anadolu tarafından tahrîr olundukda fenn-i deryâda mahâreti olmayanlar yazılmak hasebiyle umûr-ı deryâda mahâretleri olmadığından gayri meşâkk-ı deryâya tahammül edemeyip rûy-ı deryâda kimi hasta ve kimi hizmete liyâkati olmayıp ancak Şile’den Bozcaadası’na varınca Rumeli ve Anadolu etrâfında vâki‘ olan iskelelerde gemicilik eden yalı uşaklarından olmak üzere her bir iskelede olan sefâyine kıyâs ile tahammülleri mikdârı ulûfe levendât olmak üzere nefer ihrâc olundukda cümlesi fenn-i deryâda ülfetleri ve mahâretleri olmağla hizmete kādir olurlar deyü emîrü’l-ümerâi’l-kirâm bi’l-fi‘il deryâ kapudanım olan (°) -dâmet ma‘âliyehû- ihbâr edip lâkin her bir iskeleden ne mikdâr nefer ihrâc tasrîhi mümkün olmayıp şimdilik Şile’den Bozcaadası’na varınca Rumeli ve Anadolu taraflarından vâki‘ iskelelerde şayka ve çenber ve sandal ve çekeleve ve vulık ve sâir sefâyinlerden her ne mikdâr i‘mâl olunur ise ma‘rifet-i şer‘le defter ve defteri imzâlayıp mühürleyip defteri ta‘cîlen Dersa‘âdet’ime irsâl ve arz-ı i‘lâm eylemeniz bâbında fermân-ı âlîşânım sâdır olmuşdur, buyurdum ki, hükm-i şerîfimle vardıkda bu bâbda vech-i meşrûh üzere şeref-yâfta-i sudûr olan işbu emr-i celîlü’l-kadri’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi ile âmil olup hilâfıyla vaz‘ u hareketden be-gāyet ihrâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’l-hâdî ışrîn min-Muharremi’l-harâm li-sene tis‘a ve ışrîn ve mi'e ve elf. Edirne el-mahrûse. Vasale ileynâ fî 20 Safer sene [1]129