Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 245 Hüküm no: 379 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzguri'nin varislerinin kendilerine kalan evi Lasko'ya sattıkları Medîne-i Üsküdar’a muzâfe Adalar nâhiyesine tâbi‘ Heybeliadası nâm karye sâkinlerinden iken bundan akdem hâlik olan Uzguri v. Kiryazi nâm zimmînin verâseti zevce-i metrûkesi Zoli bt. Hristo nâm Nasrâniye ile sulbiye kebîre kızları Maryora ve Cevheriye ve Kokona’ya ve li-ebeveyn er karındaşı Todoş’un sulbî kebîr oğulları Yorgo ve Pandeli ve Yanaki’ye münhasıra ve tashîh-i meseleleri beş yüz dört sehmden i‘tibâr olunup sihâm-ı mezbûreden altmış üç sehmi zevce-i mezbûreye ve yüz on ikişer sehmi mezbûrât Maryora ve Cevheriye ve Kokona’dan her birine ve otuz beşer sehmi mezbûrûn Yorgo ve Pandeli ve Yanaki’den her birine isâbeti tahakkukundan sonra mezbûrûn Zoli ve Maryora ve Cevheriye ve Kokona ve Yorgo ve Pandeli ve Yanaki meclis-i şer‘-i şerîf-i enverde işbu râfi‘u’l-kitâb Lasko v. Kostantin nâm zimmî muvâcehesinde her biri ikrâr ve takrîr-i kelâm edip mûrisimiz hâlik-i mezbûrun ile’l-helâk mülkü olup ba‘de’l-helâk tashîh-i mezbûr üzere bize isâbet ve intikāl eden karye-i mezbûrede vâki‘ iki tarafı müşterek bir kıt‘a mülk arsa-i hâliyemizi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Lasko’ya altmış guruşa bey‘ ve teslîm eylediğimizde ol dahi ber-vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr altmış guruşu müşteri-i mesfûr Lasko yedinden her birimiz bi-kadri’l-hısas tamâmen ahz u kabz eyledik min-ba‘d arsa-i mahdûd-ı mezkûrda bizim kat‘â alâka ve medhalimiz kalmadı, müşteri-i mezbûrun mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Recebi’l-ferd li-sene erba‘a ve ışrîn ve mi'e ve elf. Şuhûdü’l-hâl: İbrahim Efendi b. Mehmed, Berber Hasan Çelebi b. Mustafa, İsmail Çelebi b. Şahin, Ali Beşe b. Hüseyin, Papa Navafto v. Karakil, Tarandafil v. Yamandi, Morfi v. Karakil, Diplahaki v. Peraşko, Masaki v. Aleksa, Dimitri v. Yanaki, Uzguri v. Karakil, Moskona v. Yamatari, Yasef v. Zakiri, Nikola v. Kostantin.