Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 255 Hüküm no: 393 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memleketine dönecek olan Hind elçisinin yolda emniyetinin sağlanması Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmi’l-enâm bi’r-re'yi’s-sâib mümehhidü bünyâni’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sunûfi avâtıfi’l-meliki’l-a‘lâ (°) eyâletine mutasarrıf olan vezîrim paşa -edâmallâhu te‘âlâ iclâlehû- emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm sâhibü’l-izzi ve’l-ihtişâm el-muhtassu bi-mezîdi’l-meliki’l-a‘lâm (°) beylerbeyisi -dâme ikbâluhû- ve akzâ kuzâti’l-müslimîn evlâ vülâti’l-muvahhidîn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în (°) kādıları -zîde fazluhû- ve mefâhirü’l-kuzât ve’l-hükkâm ma‘âdinü’l-fezâil ve’l-kelâm Üsküdar’dan Bağdad’a varınca yol üzerinde vâki‘ olan kādılar -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, bundan akdem Devlet-i aliyyeme gelip vilâyetine avdet eden Hind elçisi inşâallâhu te‘âlâ Üsküdar’dan Bağdad’a varınca her kangınızın taht-ı hükûmetine dâhil olur ise münâsib mahallere kondurup ve mahûf ve muhâtara olan mahallerde yanına kifâyet mikdârı mu‘temedün-aleyh yarar ve tüfenk-endâz adamlar koşup gereği gibi muhkem hıfz u hırâset ederek emîn ve sâlim birbirinize ulaşdırmakda ziyâde dikkat ve ihtimâm edip avk u tehîrden ve ihmâl ve müsâmahadan ve menâzil ve merâhilde kendüye ve eşyâlarına zarâr ve gezend erişdirilmekden ve bu bahâne ile celb-i mâl için re‘âyâ fukarâsına zulm ü ta‘addîden be-gāyet ihtirâz eylemeniz bâbında fermân-ı âlîşânım sâdır olmuşdur, buyurdum ki, hükm-i şerîfimle Dergâh-ı mu‘allâm çavuşlarından kıdvetü’l-emâsil ve’l-akrân Yusuf Çavuş ve Halil Çavuş -zîde kadruhumâ- vardıkda bu bâbda vech-i meşrûh üzere şeref-yâfta-i sudûr olan işbu emr-i celîlü’ş-şân-ı vâcibü’l-imtisâl ve lâzımü’l-ittibâ‘ımın mazmûn-ı itâ‘at-makrûnuyla âmil olup hilâfıyla bir dürlü vaz‘ u hareketden be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâmin aşer min-Rebî‘i’l-âhir sene tis‘a ve ışrîn ve mi'e ve elf. Edirne el-mahrûse. Kad vasale ileynâ fî 29 Cumâdelûlâ sene 1129