Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 260 Hüküm no: 399 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selanik Rum Metrepollid'i Agnados'un fitne ve fesadı sebebiyle Kızıl Adalar'a sürüldüğü Kıdvetü’l-kuzât ve’l-hükkâm ma‘denü’l-fezâil ve’l-kelâm mevlânâ (°) kādısı -zîde fazluhû- tevkī‘-i refî‘-i hümâyûn vâsıl olucak ma‘lûm ola ki, kıdvetü’l-emâsil ve’l-akrân Selanik sancağı mütesellimi Osman -zîde kadruhû- Rikâb-ı hümâyûnuma mektûb gönderip medîne-i Selanik’de Rum metrepollid olan Agnados nâm râhibin bundan akdem sû-i hâlini müş‘ir der-i devlet-medârıma arz ve mahzar birle medîne-i mezbûre ahâlîsi taraflarından i‘lâm olunmuşken metrepollid-i mesfûrun hevâsına tâbi‘ a‘vânından bir kaç nefer şerîr kefereler Selanik ahâlîsinden olmak üzere meclis-i şer‘a varıp metrepolid-i mesfûrdan teşekkî için kendüler eşirrâdandır, mesfûrdan her vechile râzı ve hoşnûduz, bir hâliyle şikâyetimiz [yokdur] deyü Selanik kādısını iğfâl ve bir tarîkle hüsn-i hâline müş‘ir i‘lâm etdirdip hâlâ râhib-i mesfûr mukaddemâ benim hüsn-i hâlime i‘lâm olunmuşken tekrâr sû-i hâlimi arz ve mahzar eylemek mutlak garaza mübtenîdir deyü ol dahi teşekkî etmekle keyfiyet-i ahvâli ahâlî-i vilâyetden vukūfu olanlardan tefahhus ve sıhhati üzere arz ü i‘lâm olunmak üzere mübâşir ma‘rifetiyle sâdır olan emr-i şerîfim mûcebince medîne-i mezbûrenin bi’l-cümle ulemâ ve sulehâ ve meşâyih ve a‘yân ve sâir cemm-i gafîrden tefahhus ve suâl olundukda metrepollid-i mesfûr Rum tâifesinin eşirrâsıyla ittifâk ve ittihâd üzere olup dâimâ kefere beynlerinde îkāz-ı fitne ve fesâda bâ‘is ve mehîn-i dîn ve Devlet-i aliyye olup şerri mütehakkık olduğu, cezâsı tertîb olunmaz ise her vechile mâl ve evlâd ü iyâlimizden emîn ve rahatımız yokdur ve mukaddemâ kendünün hüsn-i hâlini ihbâr eden zimmîler kendü a‘vânından mel‘anete takviyet verir eşirrâdan olmağla her gelen kādılardan birer tarîkle i‘lâmlar alıp vech-i meşrûh üzere râhib fesâd olduğunu alâ-tarîkı’ş-şehâde ihbâr etmeleriyle vâki‘ hâli hükm-i hümâyûnum verilmek ricâsına arz etmeğin sâdır olan hatt-ı hümâyûn-ı şevket-makrûnum mûcebince metrepollid-i mesfûr ıslâh edince Kızıl Adalar’a nefy ve ıslâh olunmak emrim olmuşdur, buyurdum ki Dergâh-ı mu‘allâm çavuşlarından kıdvetü’l-emâsil ve’l-akrân Hüseyin Çavuş -zîde kadruhû- vusûl buldukda bu bâbda sâdır olan emrim üzere amel dahi sen ki mevlânâ-yı mûmâ-ileyhsin, metrepollid-i mesfûr ıslâh-ı nefs edince taht-ı kazânızda vâki‘ Kızıl Adalar’a nefs ve iclâ olunup fermân-ı şerîfim sâdır olmadıkça sebîli tahliye olunmayıp mûceb-i emr-i şerîfimle âmil olasın, şöyle bilesin alâmet-i şerîfe i‘timâd kılasın. Tahrîren evâsıt-ı Receb sene tis‘a ve ışrîn ve mi'e ve elf. Sahrâ-yı Edirne. Kad vasale ileynâ fî 27