Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 261 Hüküm no: 400 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Funda satışı Galata'da Ahmed Ağa'nın elinde olup başkasının satışına izin verilmemesi İzzet-meâb nâhiye-i Adalar nâibi efendi -dâme mükerremen- ba‘de’t-tahiyyeti’l-vâfiye inhâ olunur ki, Galata’da funda mahzeninde mîrî fundacı olan bâ‘isü’l-mürâsele Ahmed Ağa’nın yedinde olan fermân-ı âlîşânda mezbûr Ahmed Ağa mîrî funda mahzeni için Tersâne-i âmire’ye ber-vech-i ocaklık senede otuz bin demet funda ve üç kıt‘a baştardaya bin ikişer yüz demet funda verip mîrî kalyonu ve sâir sefâyine iktizâ etdikçe geçdiği sene üzere mîrî funda mahzeninden kadîmden bu âna gelince fürûht olunup âhar yerlerde bir tarîkle fürûht olunduğu yok iken kadîme ve fermân-ı âlîye mugāyir fürûht edenleri men‘ ü def‘ ve kadîmden olageldiği üzere mahzen-i mezbûrda fürûht etdirilip âhardan kimesneye müdâhale etdirilmeye deyü tasrîh olunmuş iken nâhiye-i mezbûreye tâbi‘ Maldepe ve sâir kurâlar ahâlîleri kadîme ve fermân-ı âlîye mugāyir funda fürûht etmeleriyle men‘ olunmaları için bi’l-iltimâs mürâsele tahrîr ve irsâl olunmuşdur. Vusûlünde gerekdir ki, mezbûrun bundan evvel fermân-ı âlîşâna mugāyir fundaya müdâhale etdirmeyip mûcib-i fermân-ı âlî ile âmil olasız ve’s-selâm. Hurrire 21 Receb sene 1129