Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 263 Hüküm no: 406 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanmadaki gemilerin tamiri için mahzende bulunmayan kerestenin tedariki Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar kādısı -zîdet fezâiluhû- ve iftihârü’l-emâcid ve’l-ekârim câmi‘ü’l-mehâmid ve’l-mekârim el-muhtas bi-mezîdi’d-dâim bi’l-fi‘il Âsitâne-i sa‘âdetim bostancıbaşısı olan -dâme mecdühû- tevkī‘-i refî‘-i hümâyûn vâsıl olucak ma‘lûm ola ki, kıdvetü’l-emâcid ve’l-a‘yân Tersâne-i âmirem emîni Mehmed -zîde mecdühû- Âsitâne-i sa‘âdetime arzuhâl edip Donanma-yı hümâyûn kalyonları ve fırkateleri ve kal[ya]taları ta‘mîrâtı lâzımesi içün mevcûd-ı mahzen bulunmayan ecnâs-ı keresteden sen ki bostancıbaşı-yı mûmâ-ileyhsin ma‘rifetinle Üsküdar korularından kat‘ ve Üsküdar iskelesine naklolunan kereste ne makūle kereste kat‘ ve naklolunagelmiş ise mahzen-i çûbdan derkenâr olunup mûcebince kat‘ ve nakletdirilmek bâbında emr-i şerîf-i âlîşânım verilmek ricâsına i‘lâm etmeğin mahzen-i çûbda görüldükde altmış aded tulumba-i çam, dört yüz aded çapa-i demir ve üç yüz aded preçol-ı kebîr ve beş yüz aded preçol-ı palamut ve üç yüz elli aded ıskarmoz-ı kalyon ve yüz yirmi aded çapa-i ser kalyon ve yüz seksen aded eğri tahta-i fırkate ve üç yüz aded engü-i kalyata ve fırkate ve altı yüz aded kemere-i fırkate ve iki yüz aded vilistralye-i fırkate ve seksen aded makaslık-ı kalyata ve dört yüz aded doldurma-i fırkate ma‘a kalyata ve yedi yüz aded vurdinar tahtalık-ı kalyon iktizâ eylediği derkenâr olundukda imdi mûcebince amel olunmak bâbında fermân-ı âlîşân sâdır olmuşdur, buyurdum ki, hükm-i şerîfimle (°) vardıkda bu bâbda sâdır olan emrim üzere amel edip dahi sen ki bostancıbaşı-yı mûmâ-ileyhsin işbu emr-i şerîf-i âlîşân vardığı gibi zikr olunan mühimmât-ı Donanma-yı hümâyûnum kalyonları ve fırkate ve kalyatalar ta‘mîrâtı için olmağla bahâları (°) yedinden verilmek şartıyla ma‘rifetinle bir gün [akdem] kat‘ ve iskele-i mezbûreye nakletdirmekde dikkat-i tâm ve sa‘y-i ihtimâm eyleyesin, şöyle ki mühimmât-ı mezkûr vakti ile erişmemekle muzâyakaya bâ‘is olmakdan ve bu bahâne ile re‘âyâ fukarâsına mâl sevdâsıyla zulm ü ta‘addî olunmakdan ihtirâz eyleyesin, şöyle bilesin, alâmet-i şerîfe i‘timâd kılasın. Tahrîren fi’s-sânî aşer min-Şevvâli’l-mükerrem sene tis‘a ve ışrîn ve mi'e elf. El-Mahrûse-i Kostantıniyye. Kad vasale ileynâ fî 23 şehr-i mezbûr.