Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 272 Hüküm no: 420 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hapiste olan Osman'ın oğlu olup Hüseyin'e emaneten verilmiş olan çocuğun mübaşire teslimi Kıdvetü’n-nüvvâbi’l-müteşerri‘în Üsküdar kazâsından Adalar nâhiyesinde nâibi (°) -zîde ilmuhû- ve kıdvetü’l-emâsil ve’l-akrân nâhiye-i mezbûrede yeniçeri serdârı -zîde kadruhû- inhâ olunur ki, Bekir nâm kimesne arzuhâl edip bunun menkûhası olup muhâla‘a olan Keziban nâm fâhişe avratın batnından ve firâşından hâsıl olan tahmînen beş altı yaşında Ahmed nâm evlâdını mezbûre fâsıka avratın ma‘şûku olup hâliyâ zindânda habs olunan elli altı bölüğün Osman nâm kimesne nâhiye-i mezbûreye tâbi‘ Yakacık nâm karye sâkinlerinden Cebeci Ocağı’ndan on yedi bölüğün yoldaşı Hüseyin nâm kimesneye emânet konulduğu merkūm mahbûs? Osman nâm şakī haber vermeğin işbu mektûb tahrîr ve kıdvetü’l-emâsil ve’l-akrân Kullukçu İsmail -zîde kadruhû- mübâşir ta‘yîn ve irsâl olunmuşdur. Vusûlünde gerekdir ki, mübeyyen olan merkūm Cebeci Hüseyin’den sabî-i mezkûru mübâşir-i mezbûra ve ma‘an giden babasına teslîm ve tarafımıza irsâl eyleyesiz ve husûs-ı mezkûra ihtimâm ve mugāyir-i mektûb hareketden hazer edesiz, bâkiyü’s-selâm. Tahrîren evâhiri şehri Cemâziyelâhire sene [1]130 Hüseyin, Ser-sekbânân-ı Dergâh-ı âlî.