Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 276 Hüküm no: 425 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütekaid Mehmed'in Kartal'a yeniçeri serdarı tayin edildiği Kıdvetü’n-nüvvâbi’l-müteşerri‘în Üsküdar muzâfâtından Kartal nâibi (°) -zîde ilmuhû- inhâ olunur ki, taht-ı hükûmet-şi‘ârınızda yeniçeri serdârı olan (°) nâm kimesnenin ba‘zı nâ-hemvâr vaz‘ u hareketi şuyû‘ bulmağın ref‘ olunup yerine üslûb-ı sâbık üzere yirmi iki bölüğün yoldaşı mütekā‘id Mehmed -zîde kadruhû- serdâr nasb ü ta‘yîn olunmağın işbu mektûb tahrîr ve irsâl olunmuşdur. Vusûlünde gerekdir ki, devletlü inâyetlü vezîr-i mükerrem yeniçeri ağası hazretleri taraf-ı şerîfelerinden mahsûs mektûbla serdâr gelince dek bunu vekâleten serdârlığı umûruna istihdâm olunup ol cânibde vâki‘ tavâif-i mezbûrelerden yeniçeri ve cebeci ve topçu ve gılmân-ı acem ve süvârî sekbân üzerlerine bunu serdâr ve zâbit bilip sözünden taşra ve re'yinden hârici vaz‘ u hareket etmeyip itâ‘at ve inkıyâd üzere olalar ve zümre-i mezbûrelerinden bilâ-vâris-i ma‘rûf fevt olanların terekeleri izn-i şer‘le merkūma zabt ve sûk-ı sultânîde fürûht ve hâsıl olan nakdi mümzâ ve mahtûm müfredâtı defterleriyle cânib-i beytülmâle irsâl etdirdip hilâf-ı şer‘-i şerîf kimesneye gadr olunmakdan tahzîr ve mûcib-i mektûb ile âmil olasız. Bâkī ilm-i şerî‘at dâim bâd, bâkiyü’s-selâm. Tahrîren fî-evâili şehri Şa‘bân sene selâsîn ve mi'e ve elf. el-Hâc Hasan, Ağa-yı Ser-sekbânân-ı hâlâ.