Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 276 Hüküm no: 426 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhzırbaşı Veli Bey'in mahkemelerde yüzde iki akçe resm alması Nevâhî-i Üsküdar nüvvâbı efendiler el-mükerremûn Ba‘de’t-tahiyye ve’t-teslîm inhâ olunur ki, Üsküdar kazâsının muhzırbaşılığı bâ‘isü’l-mürâsele Veli Bey’in taht-ı iltizâmında olmağla gerek nefs-i Üsküdar’da ve gerek nevâhîsinde vâki‘ mahkemelerde müdde‘înin hükm etdirdiği akçeden yüzde iki akçe ahzetdirdesiz deyü tuğrâ-yı garrâ-yı sultânî ile mu‘anven fermân-ı cihân-mutâ‘ım sâdır olmağın mûcebince mürâsele tahrîr ve irsâl olunmuşdur. Vusûlünde gerekdir ki, ber-mûceb-i fermân-ı âlî bâlâda zikr olduğu vech üzere yüz akçede iki akçe resmini mezbûr Veli Bey’e ahzetdirilip hilâf-ı fermân-ı âlî kimesneye müdâhale etdirmeyip mûcib-i mürâsele ile amel eyleyesiz ve’s-selâm. Fî 6 Recebi’l-ferd sene [1]130 El-fakīr Mustafa el-Kādı bi-medîneti Üsküdar.